سحر الحمايا بقلم احمد محمود

بقالي فترة بشتكي لجوزي عشان يتصرف في أخته نهلة ويمشيها من شقتي بأي طريقة، بس زي ما بيقولوا ولا حياة لمن تُنادي، وقالي إن اخته هتعيش معانا ومش هيمشيها، ولو خيرته بيني وبينها هيختارها هي، وده بعد ما اتكلم معايا وفهمني إنها بقت يتيمة وخايف عليها تعيش لوحدها كمان البنت مريضة وعندها مرض وراثي بيخليها تتعب كل شوية ولازم تبقا في رعايته.. اقترحت عليه يوديها لأي حد من قرايبه، رفض وقال أختي مش هسبها لحد ولو فتحت الموضوع تاني هيطلقني، ولقيت نفسي غصب عني مجبرة اتحمل بنت جامعية بتشاركني في شقتي، وبقت مفروضة عليا غصب عني، عشان كدا كرهتها، كرهتها من كل قلبي.. معرفش سبب الكراهية لأني مكملتش تعليمي وهو دخلت الكلية واتعلمت، ولا سبب الكراهية لأنها واخدة مكاني، حاولت أتعامل معاها وحش بس جوزي كان بالمرصاد وكان بيعرف أي حاجة، ولو زعلتها مرة كان بيبقا يوم سيء على دماغي، ولما راح اشتكى لأهلي أبويا وقف في صفه، وفضلت على الحال ده ٦ شهور كاملين.. هي اه أغلب وقتها كانت في الجامعة أو في أوضتها، بس أوضتها دي في النهاية هي شقتي وأوضة ولادي اللي لسة مخلفتهمش، لحد ما نصحتني واحدة من صحباتي بعد ما اتكلمنا اني لو شديت حيلي وحملت هتبقا ورقة ضغط كبيرة على جوزي إنه يمشيها، وكمان هتبقا الشقة قانونًا بتاعتي وهتتغير كل الأمور.. وفعلًا ورغم اتفاقنا أنا وجوزي إننا نأجل الحمل سنتين قررت ألغي المانع وحملت، في البداية استغرب جدًا بس قولتله إني ممنعتش حاجة وده أمر الله، وفضلت مستنية يمهد لأخته عشان تمشي بسبب ابني اللي جاي في السكة، بس دايمًا كان بيفرحها ويقولها هتبقي عمة وهتفرحي أوي بابني لما يجي.. ولما فاتحته مرة تانية عرفت إن ابني لما يكبر هيبقا مع عمته في الأوضة وإنها برضه مش هتمشي، وقتها ولعت نا*ر في قلبي كانت كفيلة تحر*ق الأخضر واليابس، وكلمت صاحبتي من تاني وقولتلها إني عاوزة أمشيها بأي طريقة حتى لو هسحرها.. قالتلي إن الطريق ده غلط وبيأذي كل اللي بيقرب منه بس أنا كان عندي إصرار كامل إني اتخلص منها بأي طريقة كانت، عشان كدا فضلت أدور لمدة شهر كامل على حد بيعمل أسحار عشان أتخلص منها بأي طريقة كانت، وفي النهاية قدرت أوصل وأعرف إن فيه راجل في بلد في محافظة تانية مشهور أوي وسره باتع زي ما بيقولوا.. اتصلت بقريبتي اللي عرفتني عليه وفعلًا خدتلي ميعاد معاه وقالتلي المبلغ اللي أجيبه معايا والمطلوب، كانت شعرة أو حاجة من أتر البنت، ويا سلام لو كانت حاجة من دم الحيـ ـض بتاعها، منديل مثلًا، وأنا كان سهل أوصل لحاجة زي دي مش صعب لأني كل شوية في أوضتها.. وخدت المطلوب وروحت للراجل الصبح بدري عشان ألحق أوصل بدون ما جوزي يشك فيا، وفعلًا وصلت ودخلت على الشيخ، الراجل كان كبير أوي في السِن، كبير بدرجة مبالغ فيها، ولما دخلت عليه كلمني عن إنه الأجل قرب وهيمو*ت قريب أوي، وبما إنه آخر أعماله في الدنيا فهيعملي سحر يخلي البنت تمو*ت في أسبوع واحد بس من شدة المرض، عشان تكون نهاية كويسة عملها في حياته، أو زي ما بنقول نهاية الخدمة.. فرحت أوي من جوايا لأن حظي وصل للدرجة دي إن الراجل يعمل حاجة معملهاش قبل كدا عشان اتخلص من نهلة للأبد، أداني حاجة سودة عاملة زي حتة الصلصال وقالي لازم البنت تبلعها بأي طريقة كانت، وأنا عارفة ازاي هخليها تبلعها مع المشروب الصباحي بتاعها.. وقد كان فضلت يوم كامل بخطط لحد ما قدرت أخليها تبلع حتة الصلصال، وحسيت وقتها إني خلاص ارتحت تمامًا، وإني هتخلص منها للأبد، أسبوع واحد والبنت هتمرض وتمو*ت ويبقا قضاء وقدر، وابني يجي للدنيا بدون عمة زي دي ويعيش في شقة أبوه براحته بدون قيود.. وعدت أول تلت ليالي بدون أي حاجة، كنت بسمع صوت غريب من أوضة البنت بس صوت ضعيف خالص، في اليوم الرابع لقيتها بتنادي عليا بصوت عالي وجوزي كان في الشغل، بتنادي بعصبية وكأني مثلًا أختها الصغيرة وبتشتم كمان، تمالكت نفسي وروحتلها لقتها بتبصلي بصة غريبة وقالت: ـ أيه التراب اللي فوق الدولاب ده كله، ليه منضفتيش الأوضة كويس.. الكلمة خلتني أولع من جوايا، هو أنا كمان مطالبة أنضفلها أوضتها، كانت فرصة عشان أطلع فيها الحقد اللي جوايا كله، ولسة بشتمها وبقولها إنها تعيش هنا زي الخدامة ومتتكلمش، لقيت المنبه اللي على التسريحة راشق في راسي، لدرجة إني وقعت على الأرض، وقبل ما استوعب الصدمة مسكتني من شعري ومسحت بيا الشقة كلها، كانت وكأنها تلت رجالة في بعض مش بنت مريضة وهزيلة.. ضر*بتني علقة متضر*بتهاش في حياتي وراسي اتفتحت ونزفت دم، وهددتني وهي بتبص على بطني إني لو مسمعتش الكلام هتسقطني، هربت من إيديها عشان تنادي من تاني وتطلب مني أنضف الأوضة وإلا هتمو*تلي ابني، وهددتني لو قولت لجوزي هتدبحني.. كان جسمي متكسر وحاسة إني بمو*ت من الوجع، لدرجة إني مقدرتش أصرخ واستغيث بالجيران، ورجع جوزي يسألني عن سبب الجرح اللي في راسي والعلام*ات اللي على وشي، انهرت وقولتله إنها أخته اللي عملت فيا كدا، وراحلها لقاها مريضة ونايمة على السرير تعبانة أوي، ولما سألها أنكرت وقالت إني نزلت اتخانقت في الشارع.. وصدقها وفضل يلح عليا يعرف مين عمل فيا كدا، ومن إصراراه وجنونه قولتله دي واحدة في السوق معرفهاش مسكتني وعملت فيا كدا، ونزل يجري في الشوارع يسأل البياعين عشان يعرف مين اللي ضر*بتني بس موصلش لحل، ورجع وهو بيضر*ب كف على كف.. وتاني يوم ومسافة ما نزل سمعت صراخ نهلة وهي بتشتمني وبتطلب مني الفطار وإني أنضف الشقة كلها، روحتلها وأنا خايفة منها وعملتلها الفطار، ومن يومها بقيت شغالة زي الخدامة تحت رجليها، لدرجة إني من جناني وحقدي عليها حطتلها في مرة سم في الأكل بس اكتشفته وفضلت تضر*ب فيا عشان تجبرني أكل من الأكل المسموم وأمو*ت أنا وابني.. وياريت الموضوع وقف على كدا، نهلة بقت لما بتغ*ضب وبتبص لأي حاجة في الشقة بتولع، أول مرة لما غ*ضبت مني والبوتجاز نا*ره عليت ودراعي اتلسع لسعة مؤلمة أوي، وبعد كدا الستاير ولعت، وبعدها مرتبة السرير، كل ده وجوزي كل ما يجي يشوف مصيبة في البيت، كان هيتجنن ومش فاهم اللي بيحصل.. ولما انهرت وقولتله أختك ملبوسة وبتولع في عفش الشقة وهتحر*قنا مصدقنيش، وقالي إنه شاكك إن أنا سبب المصيبة دي كلها، لحد ما ثورت في يوم، ثورت ثورة غريبة عليها وحاولت أق*تلها، وكانت أسوأ خطوة خدتها في حياتي.. النا*ر مسكت في الشقة كلها، والدخان بقا في كل حتة لدرجة إني وقعت في الأرض وبدأت أتخنق، الجيران كسروا الشقة ودخلوا وشالوني من وسط الدخان، بس كانت فيه الكارثة الأكبر، كنت بنزف نزيف غير طبيعي وحاسة إن حد ماسك سك*ينة وبيقطع في بطني، وروحت المستشفى وأجهضت، الدكاترة بيقولوا الجنين كان متقطع بطريقة غريبة وكان إجهاض بشع مفيش دكتور شافه قبل كدا.. الشقة اتحر*قت، أجهضت، وفضلت طريحة الفراش شهر كامل مبتحركش، جوزي متحسر عليا وبيروح ويجي عليا في بيت أهلي لحد ما طلبت الطلاق، وعشان يطلقني قولتله إني عملت سحر لأخته عشان تمو*ت، بس أخته ممتتش دي بقت عاملة زي الحيوان المفترس.. وطلقني، طلقني لأنه بقا شايفني شيطانة، والعفش بتاعي كله اتحر*ق وبعتهولي محروق وهددنا أنا وأبويا لو اتكلمنا مش هيسكت وهيخرب الدنيا على دماغنا، وأبويا كان راجل غلبان سكت ومتكلمش، وخد أخته وتعب معاها لحد ما اتعالجت.. عرفت بعدها بالصدفة إن الشيخ الدجال قبل ما يمو*ت قرر يعمل حاجة خير على حظي أنا، فبدل ما يعمل سحر للبنت عشان تمرض ولا تمو*ت، عملها سحر بالحماية وبالأخص مني أنا، وكأنه بيتقرب من ربنا بآخر عمل في حياته، وده على حظي أنا، عشان كدا البنت اتلبست وبقت ملبوسة بجن بيحميها من أي شر، ومن شدة السحر كانت بتبص للحاجة تولع.. وخسرت كل حاجة في النهاية، بيتي وعفشي وابني واتطلقت، مش عارفة أتكلم ولا أقول نصيحة غير إن الست دايمًا جواها نزعة غيرة وحقد لو استسلمت ليها هتدمرها تمامًا، ولازم تفهم إن ربنا قدرلها كل خطوة في حياتها ومش هتاخد أكتر من نصيبها.. بقلم/ أحمد محمود شرقاوي