روايه نار الفرق
صباح الخير يا ماما.
_ صباح النور يا حبيب ماما.
= إيه؟ وأنا شفافة؟
اصبري على رزقك وابلعي ريقك شوية.
= أوووف، أهو صبرنا.
صباح الخير يا بَري هانم.
= صباح النور يا أوس.
يا بت بطلي الدلع المستفز ده.
= ليه بس؟ هو “أوس” وحش؟ ده كيوت خالص.
مش ناقصة فقع مرارة يا بت، كفاية عليا الامتحانات.
= ربنا معاك يا أوس.
يخربيت أوس وزفت.
= يووووه خلاص بقى مش هقولها تاني… أنا نازله.
_ بت يا أبرار! يا بت! ليه كده يا أسامه؟
يا ماما، الدلع ده بيعصبني، وبعدين هي طفلة، كل ما أعملها حاجه تتقمص.
_ معلش يا حبيبي، انزل راضيها لحسن مش هتطلع تفطر.
حاضر.
نزلت ودخلت على المطبخ، ودورت على أي حاجه آكلها.
أنا كده وقت ما أكون متعصبة أو زعلانه، أدور على أي حاجه آكلها.
هو جنان، بس ده طبعي.
ماما دخلت ورايا.
_ مين زعلك؟ علشان كده بتدوري على أي حاجه تاكليها؟
= محدش زعلني.
_ ما هو باين على وشك، إيه اللي زعلك من أسامه؟
= هو بارد أصلًا، وأنا مش ههزر معاه تاني… إنسان لزج أصلًا.
يخربيت طولة لسانك اللي أطول من برج القاهرة.
_ صباح الخير يا حبيبي.
صباح الفل يا طنط.
_ صالحها يا بني، هتخلص على الرز بلبن بتاعك اللي عملتهولك.
انتي يا سفاحة، ولا باين عليكي الأكل اللي بتاكليه ده؟
= وانت مالك؟ اخرج من مطبخنا.
طب هاتي طبق رز بلبن، انتي أصلًا مش بتحبيه.
= حبيته.
هو إيه اللي حبيتيه يا بربورة؟
= يع، بطل الدلع المقرف ده.
علشان تحرمي تقولي “أوس”.
= خلاص مش هقولها تاني.
من غير ما تتقمصي وتكشري كده.
= مش مكشرة، أهو عادي.
طب يلا نطلع نفطر.
= تؤ، مش عايزة.
تؤ؟ هتفطري معايا، يلا، علشان محضرلك مفاجأة هتعجبك أوي.
= بجد؟ إيه هي؟
لما ناكل وبلاش زن، مفهوم؟
= أووووف، طيب يلا نطلع.
يلا، ونشوف مين هيطلع أسرع.
جرينا، وهو سبقني طبعًا، وقعدنا فطرنا، وطبعًا الجو ما يخلاش من هزارنا ونقارنا في بعض.
أنا عمري ما أعرف أزعل منه، ولا هو عمره سابني زعلانه أبدًا.
خلصنا فطار، وهو نزل يصلي الظهر هو وباباه، وأنا انتهزت فرصة إن ماما ومامته بيرغوا، ودخلت أوضته.
فضلت أقلب في حاجته زي عادتي، والحمد لله عمره ما قافشني.
فضلت أقلب في حاجته وكتابته الإنجليزي المفعكشه، كتابته شبه نكش الفراخ، ههههه.
مسكت كشكول كبير، وتقريبًا ده كشكول مراجعته، هي دي عادته، بس وقع منه ظرف شكله غريب.
فتحته، وحاولت أقرأ اللي فيه، بس كان كله إنجليزي، ومعرفش ليه قلبي اتقبض وأنا بقرأ، مع إني مفهمتش منه حاجه، بس اتقبضت.
بس اتفاجئت باللي جه ونتشه مني.
