بقلم عمر على

ايه يا عزيزة هي كل مرة انا اللي اقبض عليكي

= دا من حظي الحلو يا باشا عشان اشوفك

بس المرادي ، أنتي جيبالنا معاكي وجه جديد ، اسمها ايه بقا

= مين دي يا باشا ، أنا معنديش وجه ، أنا بعتمد على الخبرة ، معنديش وقت للجديد

اهي اللي واقفة هناك ، اخر واحدة

= معرفهاش يا باشا

يعني ايه

= ااااه ، دي البت بتاعت الكوافير ، اصل في راجل جالي واتفق معايا اني اروح الكوافير دا بالذات و اطلب واحدة تجيلي البيت انا والبنات تظبطنا شوية ، وحدد اسمها بالخصوص ، ف انا روحت لانه كان دافع مبلغ حلو ، و اول ما البت جات ، شرفت انت يا باشا

ومين الراجل دا

= واحد معرفوش ، حتى طلبه دا اول مرة يعدي عليا ، بس مقدرش اقول للرزق لأ

يعني أنتي متعرفيهاش يا عزيزة

= انتي عارفني يا باشا ، بقول الحق دايما ، وغلاوتك عندي ما شوفتها قبل كدا ، دي حتى مش الاستايل اللي بحبه

ماشي ، يا عسكري ، خدهم على الحجز لحد ما يتعرضو على النيابة

” العسكري جه وشدهم ل برا ولسة بيقرب عندي

لا سيبها هنا ، امشي انت

” خرج العسكري ، لقيته قام وقعد على الكرسي اللي قدامي

انا اسف يا شهد ، أنا مش عارف اقولك ايه بس انا كنت مصدوم وقتها ، مقدرتش اسيطر على رد فعلي و…

= متتأسفش يا حضرة الظابط ، انت عملت واجبك ، وطبعا انت لازم تفكر كدا ، واحدة مصر كلها بتتكلم عنها ، الكل بقا شايف انها حاجة مسيئة للسمعة عشان اتطلقت وهربت من الاهانة اللي كانت كل يوم بتشوفها مع جوزها ، واللي يضحك ان مفيش حاجة اتغيرت ، نفس الاهانة بس ليفل اعلى ، يعني قبل كدا كان خالد بس هو اللي بيهيني ، إنما دلوقتي مصر كلها بتهيني ، وانت كمان مختلفتش عنهم ، أنا اسفة لو سببتلك اي إزعاج ، ممكن امشي؟

ممكن ، بس هتستني هنا للصبح عشان تتعرضي على النيابة وهي هتخلي سبيلك من هناك ، ومتقلقيش انا هكون معاكي لحد ما تخرجي

= لا شكرا يا حضرة الظابط ، مش عايزة اسببلك احراج أكتر من كدا ، سيبني انا بقا ل حياتي ، الخدمة اللي هتعملها معايا بس هي اني عايزة اكلم يارا ، زمانها قلقانة عليا دلوقتي ، لأنها الوحيدة اللي شيفاني بنظرة مختلفة مش زي باقي الناس

حاضر

” خدت منه الموبايل ، قومت وقفت في ركن الأوضة

ايوا يا يارا

= مين

انا شهد

= انتي فين يا شهد ، بكلمك تليفونك مقفول ، قلقتيني عليكي

انا كويسة ، متقلقيش ، اصل انا في شغل وممكن اقعد للصبح