قلوب

– لو سمحت عايزه  البس دبله تدفيني زي الناس اللي هناك دي
– أفندم!!

قالها باستغراب وهو بيرفع رأسه من علي اللاب توب بتاعه

سندت خدي علي ايدي وانا ببصله في عيونه بهيام :
– بقولك عايزه البس دبله تدفيني في الشتا

رفع حاجبه بابتسامه صغيره:
– طب وانا مالي ؟!

لويت بوقي زي الاطفال :
– تيجي تتقدملي وتخطبني

ضحك بذهول وهو بيسند ايده علي الطربيزه وبيبصلي في عيوني بنظره غريبه لكنها وترتني:
– طب واشمعني انا ؟؟

رمشت عيني اكتر من مره وانا ببلع ريقي بتوتر :
– هتصدقني لو قولتلك مش عارفه

-افهم من كده انك معجبه بقي

قالها بابتسامه هاديه وهو ساند خده علي أيده زي وبيبصلي بنفس النظره

ضحكت بسخرية:
– هو أنا اعرفك اصلا عشان اعجب بيك!

رد بنفس الابتسامه :
– اومال عايزاني اخطبك ليه هو الجواز سلق بيض

رديت بذهول :
– وهو حد جاب سيره الجواز دلوقتي ؟!!

رد باستغراب :
– اومال هنفضل مخطوبين العمر كله يا انسه …

رديت بضيق:
– زينب

ضحك برزانه وهو بيكمل كلامه:
– انا مش فاهم هو حضرتك كويسه ؟!

بصيت قدامي وانا بحارب دموعي عشان متنزلش ورديت بهدوء :
– الحمد لله أنا كويسه

رد برفعه حاجب :
– متأكده يعني بصراحه محدش يطلب من حد طلب زي ده إلا لو…

قطعت جملته بسخريه:
– إلا لو كان مجنون مش كده

رد بأحراج:
– لا مش قصدي اكيد بس يعني انتي بنت جميله ماشاء الله والف ميني يتمناكي
بصراحه مستغرب ليه تطلبي طلب زي ده من حد متعرفهوش

رديت بتلقائية:
– نفسي احب واتحب نفسي اتخطف ياجدع

وفجأه انفجر من الضحك علي رده فعلي الغير متوقعه وانا ببصله بذهول وهيام

قد ايه ضحكته حلوه وتخطف القلب والعقل !

وقف ضحك بعد معاناه وهو بيسألني :
– فصلتيني والله

رديت بضيق:
– ايوه يعني موافق ولا اشوف غيرك!

رد بذهول :
– تشوفي غيري للدرجادي حالتك صعبه

قربت وشي من وشه وانا بقول بصوت واطي وكأني بقوله سر خطير:
– اوي يا استاذ ممتاز انا بقالي خمسه وعشرين سنه سنجل معرفش يعني ايه حب

اتفاجئت أن دفعتي كلها اتخطبت وفي منهم اللي اتجوز الا العاق وليد الشريف

نفسي اتخطب زي الناس اللي هناك دي واكتب علي صوره الخطوبه

” لقد هرمنا من أجل هذه اللحظه لقد عبرنا المحيطات وهزمنا التتار والهكسسوس معاهم لقد عبرنا خط برليف لقد رزقت حبه لقد أحببته حبا لن يحبه أحد في تاريخ المحبوبين لقد كان لي خير الصديق والاب والام لقد كان لي خالتي وابن خالتي كمان ده حبيبي ده لو هشحت كدهو محبش قده “