حكايه ياسين وفريده
بعـد سنيـن غيـاب رجـع لنفـس المكـان.. ياسيـن السويفـي رجـع بعـد ما بقـى مـن أكبـر رجـال الأعمـال.. رجـع لنـفس المكـان اللـي خـرج منـه مكـسـور.
المـزاد كـان شغـال علـى قصـر عيـلة “المنصوري” القصـر اللي كـان في يـوم من الأيـام حلـم بعيـد بالنسبة له… وهو واقف على بابه مستني أبوه يخلص شغله كبواب.
رجع بعينيه للمكان… كل تفصيلة فيه محفورة جواه… السلم الكبير… النجف الضخم… وحتى ريحة المكان… نفس الريحة اللي كانت مرتبطة بيها…
فريدة.
اسمها جه في دماغه زي الطعنة.
غمض عينه لحظة… وكأن الماضي كله رجعله دفعة واحدة…
“إنت مين عشان تبص لبنتنا؟!”
“إنت ابن بواب!”
“اختفي من هنا بدل ما نبلغ عنك!”
وأبوه… وهو بيتسحب من إيده قدام الكل… مكسور… متهان…
وآخر صورة… أبوه وهو على السرير قبل ما يموت… وصوته الضعيف:
“خليك راجل يا ياسين… وما تسيبش حقك…”
فتح عينه فجأة… وملامحه اتحولت لجمود مرعب.
الموظف أعلن: “نبتدي المزاد… السعر الابتدائي 50 مليون جنيه.”
بدأت الأيادي تترفع… والأرقام تعلى…
“60 مليون” “70 مليون” “85 مليون”
وفجأة…
“100 مليون.”
الصوت كان هادي… بس قاطع كل اللي في القاعة.
الكل بص ناحيته.
ياسين وقف… وحط إيده في جيبه… وقال بثقة:
“القصر ده… أنا هاخده.”
الهمسات زادت… والصدمة بقت واضحة على وشوش الناس…
لكن الصدمة الأكبر كانت عند الباب…
لما دخلت واحدة… وقفت مكانها أول ما شافته…
عينها وسعت… ونفسها اتقطع…
فريدة.
بعد كل السنين دي… واقفة قدامه تاني…
بس المرة دي… مش هو الشاب الفقير اللي كانت بتدافع عنه…
ولا هي البنت المدللة اللي الكل بيحميها…
نظراتهم اتقابلت…
وفي اللحظة دي…
كل حاجة رجعت… الحب… الوجع… والخيانة…
ياسين ابتسم ابتسامة خفيفة وقال بصوت واطي، بس وصلها:
“وحشتيني يا فريدة…”
لكن اللي جواه قال حاجة تانية خالص:
“بس المرة دي… أنا اللي هوجعك.”
—
القاعة لسه مليانة همسات… والكل بيبص على ياسين كأنه لغز اتحل فجأة…
لكن فجأة…
باب القاعة اتفتح بعنف.
ودخلوا…
عيلة المنصوري.
الأب بملامحه المتجمدة… الأم ملامحها فيها صدمة ممزوجة بغرور قديم… وفريدة واقفة بينهم، قلبها بيدق بعنف وهي شايفة المشهد كله بيتكرر بشكل غريب… بس مقلوب.
الموظف قرب منهم بسرعة وقال: “المزاد خلاص قرب يخلص يا فندم… والقصر اتباع.”
الأب قال بحدة: “اتباع لمين؟!”
