اريدك انت اميره مدحت
الصدمة خدتني ومكنتش عارفة أعمل إيه؟!.. ولا حتى أستوعب، إلا أني حسيت أن في حد بيشلها من عليا وبيزقها بعيد، وبعدين حسيت بنفسي عاملة زي الفراشة وأنا بقوم من على الأرض، رفعت راسي لقيت زياد واقف بيدقق في ملامحي بقلق وهو بيسألني:
-أنتي كويسة؟!.. فيكي حاجة بتوجعك؟!..
هزيت رأسي بلأ، قبل ما يسبني ويروح لـ سها، وملامحه أتقلبت لقسوة تخلي أي حد يترعب منه، وقالها بصوت كله قوة وغضب:
-أسمعي يا بت أنتي، أنا بطبعي مش بمد إيدي على ست، لكن قسمًا بالله لو قربتي من ناحية رويدا تاني، أنا مش همد إيدي، ده أنا هدفـ.نك مطرح ما أنتي واقفة، رويدا خط أحمـــر، وأظن أنتي عارفة أنا ميــن.
مسحت سها التراب إللي على وشها وهي بتزعق:
-وأنت مالك بيها، تقربلها إيه عشان تحميها.
الكل أستنى منه الجواب، ورويدا توترها زاد لأنه كدا هيقول أنها هتبقى مرات خاله قريب، لكن أتصدمت زي كل الواقفين وزي سها لما قال بلهجة فيها تحدي:
-لأنها حبيبتي وقريب أوي هتبقى مراتــي، فإياكي تفكري تقربي منها، وإلا هندمك على ده.
قال الكلام ده قبل ما يلف، فـ لقى رويدا بتبصله بصدمة وذهول، مسك إيدها وأتحرك بيها، فقبل ما تتكلم، قال بهدوء:
-متتكلميش دلوقتي، خالي موجود في البيت، لما نوصل هناك هقوله على كلام إللي قولته وهفهمك على كل حاجة.
وفعلًا مكنش قدامي حل غير أني أسكت.
*****
-بس يا خالي وهو ده إللي حصل، فمعلش أنا إللي هتجوز رويدا.
الكلام ده قاله زياد قدام خاله وأبويا، تعبيرات وشهم كانت هادية تمامًا، قبل ما يسأله رأفت بهدوء:
-الكلام ده لو أنت بتحبها وآآآ..
-بحبهـــا، والله بحبها ومن زمان أوي.
قالها زياد بصوت مليان مشاعر وكأن أخيرًا قدر يطلع الجملة دي من قلبه، بصيتله بذهول، فراح كمل بصدق ودقات قلبه بتعلى:
-أنا حبيتها من سنتين، لما جت أشتغلت مُدرسة في القرية عندي، سمعت عنها كلام كتير حلو، بس أنت عارف قوانين القرية بتقول متجوزش برا، وأنا كبير القرية، فإزاي هكسر القانون ده، فضلت بعيد براقبها في صمت، لغاية ما أتفاجآت في يوم أنها ببتجوز.
عيونه لمعت جامد وهو بيسأله بوجع:
-مسألتش نفسك ليه إبن أختك فضل حابس نفسه أسبوع، والأكتئاب ده جاله منين؟!.. مسألتش نفسك وقولت إن إيه إللي جرالي فجأة، أنا مش عايزها تضيع مني تاني يا خالي، مش هقدر أستحمل المرة دي.
دموع نزلت من عيون رويدا وهي بتبصله بصدمة، وبعدين بتبص لرأفت بضحك وكأنها بتقوله ده بجد؟!.. إبتسملها رأفت قبل ما يقول لزياد بحنية:
-وأنت تبقى عبيط أوي لو صدقت أن خالك كان ممكن يتجوز أصلًا بعد ما نجوى مـ,ـاتت.
