سفريه شغل

رجعت من سفرية شغل قعدت 48 ساعة، لقيت ابني الرضيع بيصرخ صريخ يقطع القلب، ومراتي مغمى عليها ومرمية على أرض المطبخ... وأمي قاعدة على السفرة بكل برود بتاكل غداها وبتقول عليها "بتمثل وعايزة لقطة"! صوت صريخ الواد خبط في ودني قبل ما أفتح باب الشقة أصلاً، وفي اللحظة دي بالذات، كل عذر خلقته لأمي في حياتي مات وانتهى. ده ما كانش صريخ زقزقة بتاع عيل جعان، ولا عياط واد مأريف عايز يغير الحفاضة... ده كان صريخ حاد ويقطع القلب، صوت مرعب طالع من حتة جوه قوي، كسر هدوء البيت الشيك ودخل شق صدري. أنا سمعت "نوح" وهو بيعيط قبل كده، هو لسه عنده 6 أسابيع، والعياط هو لسه لغته الوحيدة تقريباً. بس المرة دي كانت غير. ده كان رعب، كان هلكان، كان جسم صغنن بيستغيث لأن الدنيا وسعت عليه قوي وما فيش مخلوق بيرد عليه. إيدي فرطت من المفتاح. أنا غبت 48 ساعة بس. يومين بالعدد. دي كانت أول سفرية شغل ليا من ساعة ما مراتي "نور" ولدت، وطول الساعات دي وأنا مش على بعضي وقلبي واكلني. ما كنتش عايز أسيبها خالص، لسه قايمة من ولادة قيصرية صعبة ومفاجأة، أخدت من صحتها وعافيتها أكتر بكتير من اللي كنا متوقعينه. كانت ساعات تقوم الصبح تتمشى في الشقة وهي سانده بإيدها براحة على بطنها، وشها مخطوف بس عافر، وبتبين إنها زي الفل عشان هي من نوع الستات اللي بتتحرج تطلب الراحة أو تبان تعبانة. كان المفروض عقلي يبقى في راسي وما أسيبهاش. بس أمي "فاطمة" هي اللي صممت وأصرت. وقفت وقتها في المطبخ بلبسها الشيك، وحلق اللولي، وضحكتها الواثقة اللي بتخدع الناس بيها من سنين وقالت لي: "سافر إنت وشوف شغلك يا محمود، أنا هقعد معاها. نور محتاجة ست خبيرة في البيت تفهم في الأصول، مش جوز ملهوف وموسوس واقف فوق دماغها". فاكر إني بصيت لنور ساعتها، كانت قاعدة على تربيزة الفطار، واخدة نوح في حضنها ومقعداه على كتفها، وشعرها ملموم كعكة منكوشة، والمسواد تحت عينيها يزعل. ابتسمت بضعف وقالت لي: "سافر يا محمود متقلقش، طالما طنط عايزة تساعدني هبقى كويسة". أنا بقى كان نفسي أصدق ده. ربنا يسامحني، كان نفسي أصدق. #روايات #مشيره_محمد رغم إن عندي 34 سنة، ومعايا ماجستير حقوق، ومحامي شاطر وناجح في القضايا، وعندي زوجة وابن رضيع، وشقة ملكي ومكتوبة باسمي لوحدي... بس كان لسه جوايا حتة من الواد الصغير اللي واقف في مطبخ أمه، بيسمع الكلام وبيقول حاضر على أمل إنها تحن عليه في يوم من الأيام. عشان كده سافرت. ودلوقتي نوح بيصرخ صريخ يحسسك إن ما حدش لمسه ولا قربه منه من ساعات. زقيت الباب بقوة لدرجة إنه رزع في الحيطة. شنطة السفر وقعت من على كتفي على أرض الصالة، عجل الشنطة فضلت تلف وهي في مكانها، منظر عادي وتافه وسط حياتي اللي كانت بتشقلب وتنهار على الناحية التانية من الطرقة. زعقت وأنا بجري: "نوح؟ نور؟" ريحة البيت كانت مليانة فراخ محمرة في الفرن، وتوم وزبدة، وفي ريحة شياط خفيفة على الأطراف. الريحة دي في العادي تفتح النفس وتحسسك بالدفا، بس دسمة الأكل قلبت بطني وقرفتني قبل حتى ما أوصل للمطبخ. المنظر جوه جمد الدم في عروقي. نور كانت مرمية على السجادة بين رخامة المطبخ وسفرة الأكل، قاطعة النفس تماماً. وشها كان أصفر ليمونة، وخالي من أي نقطة دم. شفايفها باينة ناشفة ومشققة. إيد من إيديها كانت ممدودة ناحية سرير نوح الهزاز، كأنها كانت بتحاول توصله قبل ما جسمها ينهار ويخونها. تيشرتها كان غرقان عرق، وشعرها لازق على خدها. كانت باينة صغيرة وضعيفة قوي وهي مرمية على السجادة الغامقة، لدرجة إن في ثانية مرعبة، عقلي رفض يستوعب إن دي مراتي! وجنبها، نوح في سريره، وشه أحمر دم وبيترعش من كتر العياط، وإيديه الصغيرين عمالين يتنفضوا في الهواء. الواد صوته اتنبح وشرق من كتر الصريخ. جسمه الحنين كان بيتنفض كأن طاقته خلصت بس الرعب اللي جواه لسه ما خلصش. وعلى سفرة الأكل، على بعد أقل من 3 متر منها... أمي قاعدة بتاكل غداها! لا طلبت إسعاف. لا شالت ابني تهديه. ولا حتى وطت على ركبتها تشوف البنت اللي مرمية في الأرض. قاعدة بتاكل! صينية الفراخ المحمرة في نص السفرة متقطعة وجنبها رز بالشعرية، وشوربة لسان عصفور، وسلطة خضرا محطوطة في سرفيس كريستال. الشوك والسكاكين مرصوصة على سينير السفرة. ومناديل قماش، وكوبايات مياه، وشفشق عصير ساقع. عزومة كاملة، مش أكل لست والدة وتعبانة مش قادرة تقف على رجليها عشان تاخد دش! أمي رفعت الشوكة، أخدت قطمة، ومضغت براحة وبكل برود، وبصت لنور بنظرة قرف وضيق. وبرطمت وقالت: "بتمثل... عايزة لقطة". الكلمتين دول ما خلّونيش أنفجر. دول عملوا فيا حاجة أوحش بكتير. خلوني أسكت تماماً.#روايات #مشيره_محمد في حاجة جوايا اتطفت ونزلت في حتة ضلمة وباردة قوي، لدرجة إني ما عرفتش نفسي. ما زعقتش، ما سألتش إيه اللي حصل، ولا طلبت تفسير... لأن التفسير ده بنحتاجه لما نكون في موقف ممكن يتفهم غلط. لكن ما فيش أي سوء تفاهم في منظر ست قاعدة بتاكل بمزاج ومرات ابنها مغمى عليها جنبها والطفل بيصرخ ويموت من العياط. اتحركت. رحت لنوح الأول، حطيت إيدي الاتنين تحت جسمه اللي بيترعش وشيلته وضميته لصدري. صريخه اتقلب لشهقات ونشيج متقطع أول ما حس بيا. بدأ يدفن وشه في قميصي وهو بيدور على أمان، وشه السخن كان لزق تحت دقني. همست له: "أنا هنا يا حبيبي، بابا هنا، خلاص يا روحي". وبعدين نزلت على ركبي جنب نور. "نور..." الصوت اللي طلع مني ما كانش شبه صوتي اصلاً. عدلت نوح براحة على كتفي، وحطيت صباعين على رقبة نور... نبضها كان شغال بس سريع وضعيف جداً. لمست خدها، جلدها كان ساقع ومندي عرق. "يا بنتي قومي، عشان خاطري، نور أنا جيت". جفون عينها اتهزت. نفسي رد فيا لدرجة إن عيني غششت وما بقتش شايف. همست وصوتها طالع بالعافية: "محمود؟" "أنا جنبك يا حبيبي". شفايفها حاولت تجمع كلام بس ما طلعتش حاجة، وعينيها راحت غفلت تاني. ومن ورايا، سمعت أمي بتنفخ بصوت عالي وبكل ملل... كأني قطعت عليها المسلسل اللي بتسمعه! تأفف أمي ونفختها خلّت الدم يغلي في عروقي، بس جمدت نفسي عشان نور ونوح. طلعت تليفوني بسرعة وطلبت الإسعاف، وصوتي كان حاد وثابت زي السكينة وأنا بوصف للمسعف الحالة وعنوان البيت. أمي فضلت قاعدة مكانها، مسكت كاس العصير، أخدت بؤ، وقالت بنبرة عتاب كأني أنا اللي غلطان: "جرى إيه يا محمود؟ مكبر الموضوع كده ليه وطالب إسعاف وفضايح في الحتة؟ البنت ما فيهاش حاجة، دي شوية دلع بنات بس عشان تخليك ما تسافرش تاني وتفضل قاعد تحت رجلها!" بصيت لها ونظرتي كانت كفيلة تخلي أي حد يخاف، بس هي كان عندها برود يحرق الدم. ما ردتش عليها بكلمة، وطيت على نور، وبدأت أعمل زي ما المسعف قالي في التليفون؛ رفعت رجليها شوية براحة، وجبت حتة قماشة مبلولة مياه ومسحت على وشها ورقبتها وأنا بنده عليها: "نور.. فوقي يا حبيبتي.. أنا جنبك". أخيراً، نور بدأت تفتح عينيها ببطء شديد، وشها كان لسه باهت وعينيها مش مركزة. أول ما شافتني، دموعها نزلت من غير صوت، وبصت لسرير نوح برعب وقالت بصوت مبحوح: "نوح.. نوح عمال يعيط من الصبح.. أنا تعبت قوي يا محمود.. بطني كانت بتتقطع وما قدرتش اقف.." قلت لها وأنا ببوس رأسها وبطمنها: "نوح في حضني وزي الفل يا حبيبتي، خلاص أنا جيت وكل حاجة هتبقى تمام". في الوقت ده، صوت سرينة الإسعاف سمع في الشارع، والمسعفين طلعوا بسرعة. أول ما دخلوا المطبخ وشافوا منظر نور على الأرض والوضع العام، قاسو ضغطها وسكرها، واتضح إن ضغطها كان واطي جداً وعندها هبوط حاد ونزيف خفيف بسبب الإجهاد الشديد والضغط على جرح القيصرية اللي لسه ما لمش. المسعف قالي بنبرة لوم: "المدام محتاجة تتنقل المستشفى فوراً.. جرحها مجهد جداً وهي عندها جفاف واضح.. إزاي تتساب في الحالة دي من غير رعاية؟" أمي وقفت أخيراً من على السفرة، وعدلت لبسها الشيك وقالت للمسعف بكبرياء: "رعاية إيه يا كابتن؟ أنا معاها هنا من يومين ومحصلش حاجة، هي اللي طول النهار نايمة وسايبة الواد يزن، ولما حبت تطبخ لوزير الغبرة جوزها، عملت الحركتين دول أول ما سمعت صوت مفتاحه في الباب!" هنا أنا ما قدرتش أسكت. لفيت لأمي وزعقت لأول مرة في حياتي بصوت هز حيطان الشقة: "اسكتي خالص! مش عايز أسمع صوتك! إنتي إيه؟ ما فيش في قلبك رحمة؟" أمي اتصدمت من زعيقي، ووشها احمر من الغضب وقالت: "إنت بتعلي صوتك عليا عشان دي؟ أنا أمك يا محمود!" قلت لها وأنا بساعد المسعفين يشيلوا نور: "أمي اللي المفروض تكون بتفهم في الأصول ورحيمة.. مش اللي سابت مراتي تموت وابني يتنبح صوته وهي قاعدة تلتهم فراخ ورز! اطلعي بره بيتي يا أمي.. بره!" أمي أخدت شنتطها وهي بتبرطم وتدعي عليا وتقول إني خسرت رضاها وعقيت بيها عشان "واحدة غريبة"، ومشيت ورزعت الباب وراها. أخدنا نور على المستشفى، وركبوا لها محاليل، والدكتورة أكدت إنها كانت بتمر بحالة إعياء شديدة نتيجة إنها ما ارتاحتش ولا نامت ولا أكلت تقريباً طول الـ 48 ساعة اللي فاتوا! نور لما بقيت أحسن وقدرت تتكلم، حكت لي وهي بتعيط إني أول ما سافرت، أمي ما لمستش كوباية مياه في البيت. كانت بتطلب من نور تقوم تطبخ لها وتنظف، ولما نور كانت تشتكي من وجع القيصرية وتطلب ترتاح، أمي كانت بتهزأها وتقول لها: "إحنا كنا بنولد ونقوم نشتغل في الغيط تاني يوم، بلاش مياعة جيل فاشل". ونور عشان مؤدبة وبتحبني، كانت بتضغط على نفسها لحد ما جسمها انهار تماماً وهي بتحاول تروح لنوح اللي كان بيصرخ من الجوع وعايز يرضع وأمي مطنشاه تماماً وسيباه يصرخ. بعد يومين في المستشفى، رجعت بنور ونوح البيت. نور بدأت تسترد عافيتها بالتدريج. أمي حاولت تكلمني وبعتت لي رسايل تقولي فيها إني لازم أعتذر لها وأبوس إيدها عشان اللي عملته، وإنها كانت "بتعلم مراتي الأدب وتخليها تشيل المسؤولية وما تتدلعش". أنا ما ردتش على رسايلها، وعملت لها "بلوك" من حياتي مؤقتاً، وكلمت إخواتي وفهمتهم اللي حصل بالظبط عشان ما حدش يلومني أو يصدق كلامها المذوق. دلوقتي، بيتي رجع له هدوءه، ونور نايمة في السرير وجنبها نوح بيتنفس براحة، وأنا قاعد جنبهم بحلف نفسي إني عمري ما هسمح لأي مخلوق - حتى لو كانت أمي - إنه يكسر فرحتي ببيتي أو يأذي عيلتي الصغيرة تاني، وحسيت إن الواد الصغير اللي جوايا اللي كان مستني حنية أمه.. مات وشبع موت في اليوم ده. تمت. مشيره محمد