كبرياء على كرسي الباشا

(كبرياء على كرسي الباشا) واحدة ست نايمة في سابع نومة على أغلى كرسي جلد في البرج كله، ولا كأن الجاذبية غلبتها أخيراً بعد طول عذاب. عاصم بيه الشناوي وقف في مكانه ومبقاش عارف ينطق. الكرسي ده بالذات كان خط أحمر، "حاجة مقدسة" ومحدش يجرؤ يلمسها. قاعدة كل الموظفين في شركة "الشناوي جروب" حافظينها صم: الكرسي ده مبيتلمسش، واللي يقرب منه أو يفكّر يقعد عليه، يعتبر مرتبه اتكل على الله. عاصم كان ممشي شركته في وسط القاهرة زي الساعة، من نوعية الرجالة اللي بيظبطوا برواز الصورة المايل بالمسطرة. راجل عايش على الجداول، والسكوت، والخوف اللي بيسيبه في قلوب الموظفين أول ما رجله تخطي المكان. الدنيا كانت ليل متأخر يوم الجمعة، وكان راجع مكتبه عشان يقفل حسابات الأسبوع زي عادته... كل حاجة تحت السيطرة التامة. بس تفاجأ إن أنوار المكتب لسه منورة. وفيه حد كسر القاعدة الوحيدة اللي عمرها ما اتكسرت. الست كانت لابسة اليونيفورم الأزرق بتاع النظافة، والكارنيه بتاعها معوج، وتوكة شعرها فكت وسابت من ساعات. إيديها كانت مفرودة على مساند الكرسي وكأن العالم وقف لأول مرة من بداية اليوم. عاصم حس بالدم بيغلي في عروقه والحرارة طالعة لرقبته. خد ثلاث خطوات ناحيتها. وبإيد ناشفة، خبط على كتفها. من غير أي حنية. فتحت عينيها. بس الغريبة إنها مخافتش، ولا اتخضت! قعدت مفرودة، وخدت نفس طويل، وبصت في عينيه بكل ثبات ولا كأنها مستنية إذن من حد عشان تعيش. مكنش في وشها لؤم أو قلة أدب... كان فيه بس تعب هدد حيلها، وكرامة هادية خلت عاصم نفسه يتلجم ومش عارف يتصرف ازاي. قالت بصوت ثابت ومترددش: "أنا شغال بقالي تمنتاشر ساعة.. لو عايز تطردني اطردني، بس رجلي مكنتش شايلاني وكان لازم أقعد". عاصم بربش بعينيه وكأنه أخد قلم على وشه. تمنتاشر ساعة! فضل يبص في وشها يدور على أي تمثيل، أو حجة، أو الشو اللي الناس بتعمله لما تتقفش بتغلط. ملقاش أي حاجة من دي. كل اللي شافه وش باهت ومجهد لواحدة وقفت على رجليها اليوم كله. هدوء حد ميبقاش باقي على حاجة ومستعد يخسر أي وضع. سألها ونبرة صوته الحادة ا تكسرت شوية: "إسمك إيه؟" "رضوى عبد العال." "بقالك يومين هنا... ونايمة على الكرسي بتاعي؟" رضوى رفعت راسها لفوق. مش تناكة، لأ... ده صدق: "النهارده لبسوني شغل ثلاث أدوار عشان الوردية الليلية منزلتش. بدأت من الساعة ستة الصبح، ورجلي مبقتش حاسة بيها. مكتبك خلص وبقى زي الفل.. وأنا خلاص، كنت بفصل." عاصم بص حواليه. المكتب كان بيبرق، مفيش ورقة مش في مكانها، ولا البصمة على الزجاج. المكتب ينفع يتصور في مجلة. الـ "لخبطة" الوحيدة في المكان كانت الجسد الهدّان ده، اللي طاقته خلصت ومبقاش فيه حيل يكمل. "وليه مطلبتيش بريك؟" ضحكت ضحكة مريرة سريعة خطفت وشها زي الوجع: "عشان المشرف قاللي: تخلصي شغلك، يا إما متجيش يوم الإثنين." عاصم سكت ومتحركش. ده مكنش نظام أو انضباط في الشغل... ده كان تهديد. وعاصم بيفهم في التهديدات كويس أوي. ياما استخدمها قبل كده في العقود والمواعيد الصعبة، وبقوة هادية من غير ما يعلي صوته. بس دي كانت أول مرة يشوف فيها الوجع الحقيقي والضغط ده لما ينزل على قفا حد غلبان ملوش ضهر يصد عنه. سألها: "بيدوكي كام؟" قالتله: "مية وتلاتين جنيه في اليوم... ده لما بيرضوا يدفعوهم أصلاً." زور عاصم اتقفل، وباع ريقه بصعوبة. افتكر القلم اللي في درج مكتبه اللي تمنه يعدي آلاف، وافتكر ثلاجة شقته الفاضية اللي مليانة أكل مبيلمسهوش. وافتكر ازاي كان دايماً فاكر إن الدنيا لازم تقف وتتظبط عشانه، حتى لو الناس اتهرسوا عشان يشيلوها. قالها: "اقفي." رضوى اتحركت بسرعة، وهي مستنية الإهانة، وجاهزة إن الأمن ييجي يطردها بره المبنى زي الزبالة... روايــات_مشـيره_مـحمد عاصم بيه الشناوي فضل واقف مكانه، باصص للست اللي واقفة قدامه وهدومها متبهدلة من الشقى. رضوى كانت لسه بتعدل الجاكيت الأزرق بتاعها وإيديها بترعش رغماً عنها، مستنية الكلمة اللي هتقطع عيشها. في ميكانيكية غريبة في حركتها، ميكانيكية الخوف اللي متعود على الضربات، الخوف اللي بيخلي البني آدم يلملم حاجته بسرعة قبل ما يترمي بره. عاصم مكنش متعود يشوف الوجع ده من قريب. هو بيشوف أرقام، تقارير، نسب أرباح، وخساير. لكن بني آدم بيبص في عينيه وهو ميت من الرعب على مية وتلاتين جنيه؟ دي كانت جديدة عليه. "انتي قلتي اسمك رضوى إيه؟" عاصم سأل بصوت هادي، هادي لدرجة خضت رضوى أكتر من الزعيق. "رضوى عبد العال يا فندم.." صوتها طلع مكتوم، وعينيها نزلت للأرض لأول مرة. كبرياءها اللي ظهر من لحظات بدأ يتآكل قدام فكرة إن عيالها ممكن مياكلوش الأسبوع الجاي. "أنا والله مش قصدي أقعد على الكرسي تطفل.. أنا بس ضهري قفش عليا ومبقتش حاسة بركبي." عاصم مشي خطوتين ناحية الشباك الإزاز الكبير اللي بيبص على شوارع القاهرة المنورة بنور خافت في نص الليل. الكورنيش من بعيد كان باين زي حبل نور ممدود، والعربيات ماشية زي النمل. فكر في نفسه، وفي البرج ده اللي هو بيملك نص أسهمه. فكر في المشرف اللي بيلوي دراع الغلابة عشان يظهر قدام الإدارة إنه "مسيطر". لف وشه ليها وقال: "المشرف بتاعك اسمه إيه يا رضوى؟" "أستاذ مدحت.. مدحت عبد القوي، المسؤول عن عمال النظافة في الوردية المسائية." عاصم هز راسه ببطء، وراح قعد على الكرسي الجلد الفخم اللي كان سبب الأزمة. الكرسي لف بيه بهدوء، وحس لأول مرة إن الجلد بتاعه ساقع، ساقع وزيادة عن اللزوم. بص لرضوى اللي واقفة زي المتهمة في قفص المحكمة. "اقعدي يا رضوى." رضوى اتسمرت مكانها، وبصت للكرسي التاني اللي قدام المكتب، كرسي الضيوف اللي مصنوع من الخشب الزان والجلد الطبيعي برضه. "أقعد فين يا فندم؟ لا مؤاخذة أنا هدومي مش نظيفة.." "قلتلك اقعدي." نبرة عاصم كانت قاطعة، مفيش فيها مجال للمناهدة. قعدت على طرف الكرسي، مكنتش قادرة تفرد ضهرها، كأنها خايفة تسيب جسمها يرتخي فمتعرفش تقوم تاني. عاصم فتح درج مكتبه، الدرج اللي فيه شيكات بملايين، وطلع منه نوتة صغيرة وقلم حبر غالي. سألها: "انتي معاكي شهادة يا رضوى؟ ولا دخلتي مدارس؟" رضوى اتنهدت، وابتسامة مكسورة ظهرت على وشها: "معايا دبلوم تجارة يا بيه. وكنت شاطرة في الحسابات والله.. بس الأيام والظروف. جوزي الله يرحمه سابلي عيلين، ومفيش معاش يصرف علينا. نزلت اشتغل أي حاجة عشان ممدش إيدي لحد. الشغل مش عيب، بس الإهانة هي اللي بتوجع." عاصم فضل يكتب في النوتة وهو ساكت. السكوت في المكتب كان تقيل، ومكنش بيقطعه غير صوت التكييف المركزي اللي شغال بانتظام. "بقالك قد إيه في الشركة هنا؟" "ست شهور يا فندم. ببدأ من وردية الصبح ساعات، وساعات بياخدوني وردية بليل لما حد يغيب، زي النهاردة كده. بس عمري ما قصرت، اسأل الستات بتوع البوفيه والمهندسين في الدور الـ 35، أنا بنظف مكاتبهم ومبخليش ففتفوتة تراب." عاصم قفل النوتة وحط القلم فوقيها. بص لرضوى بكل تركيز، وكأنه بيعيد حسابات معادلة رياضية بقاله سنين بيحلها غلط. "انتي عارفة الكرسي اللي كنتي نايمة عليه ده بكام؟" عاصم سأل فجأة. رضوى بلعت ريقها وخافت: "أكيد غالي يا بيه.. باين عليه." "الكرسي ده تمنه يشتري شقة كاملة في منطقة شعبية." عاصم قالها ببساطة صدمتها. "أنا استوردته مخصوص من إيطاليا. وكنت فاكر إن قيمته في تمنه، وفي الهيبة اللي بيديها للمكتب. كنت فاكر إن الناس لما تخاف تقرب منه، يبقى أنا كده ناجح ومسيطر." سكت شوية وبص لإيد رضوى الخشنة من كلور ومواد التنظيف: "بس النهاردة عرفت إن الكرسي ده ملوش أي قيمة لو كان مبني على تعب ناس تانية بياخدوا مية وتلاتين جنيه في اليوم ومبيلاقهومش." رضوى مكنتش فاهمة عاصم بيه عايز يوصل لإيه. هل ده فخ؟ هل بيجاملها قبل ما يطردها؟ "أنا آسفة يا فندم.. لو حضرتك عايزني أمشي دلوقتي، أنا هلم حاجتي وأمشي. بس بالله عليك بلاش يخصموا مني أيام الإسبوع ده، العيال ملهمش ذنب." عاصم قام من على كرسيه، ومشي لحد ما وقف قدامها. "انتي مش هتمشي يا رضوى. وأيامك مش هتتخصم." طلع تليفونه من جيبه، واتصل برقم. الانتظار مطولش، رد عليه صوت مبحوح ومرعوب من النوم: "أيوة يا عاصم بيه! خير يا فندم في حاجة حصلت في الشركة؟" "أستاذ مدحت؟" عاصم قال بصوت هادي ومرعب. "أنا واقف في مكتبي في الدور الـ 38. ومعايا رضوى عبد العال." الخط جه عليه سكون تام. مدحت المشرف صحصح في ثانية: "رضوى؟ هي الهانم هببت إيه؟ أنا قايلها تنظف المكتب ومتهوبش ناحية حاجتك! لو عملت حاجة أنا هطردها فوراً يا فندم ولا يهمك.." "انت هتيجي الشركة دلوقتي حالا يا مدحت." عاصم قاطعه بقسوة. "قدامك نص ساعة بالظبط وتكون في مكتبي. لو اتأخرت دقيقة واحدة، متجيش خالص." وقفل السكة في وشه. رضوى شافت المنظر ده وجسمها كله ساب. "يا بيه.. أنا مش عايزة أقطع عيش أستاذ مدحت.. هو برضه تلاقيه مضغوط من الإدارة الكبيرة." عاصم بص لها باستغراب: "انتي بتدافعي عنه بعد ما هددك بقطع عيشك وشغلك تمنتاشر ساعة؟" "عشان أنا دوقت طعم قطع العيش يا بيه، ومراره ميتوصفش. مش عايزة أكون السبب في إن حد يدوقه بسببي، حتى لو كان ظلمني." الكلمة دي نزلت على عاصم زي الصاعقة. الست الغلبانة دي، اللي بتكافح عشان مية وتلاتين جنيه، عندها رحمة وإنسانية أكبر من اللي عنده وهو بيمتلك ملايين في البنوك. مرت النص ساعة وكأنها سنة. رضوى قاعدة مش على بعضها، وعاصم واقف باصص من الشباك ومبيتكلمش. فجأة الباب خبط خبطات سريعة ومرتبكة. "ادخل." عاصم قالها. دخل مدحت المشرف، وكان بينهج وهدومه مش مظبوطة من السرعة. أول ما دخل وبص لقى رضوى قاعدة على الكرسي وعاصم واقف، وش الصدمة والرعب اترسم على ملامحه. "مساء الخير يا عاصم بيه.. أنا جيت في المعاد اهو.. خير يا فندم؟" عاصم مشي ببطء لحد ما بقى واقف قدام مدحت. "مدحت.. انت بقالك كام سنة في الشركتنا؟" "خمس سنين يا فندم، وتحت أمرك في أي وقت." "خمس سنين.. يعني المفروض تكون شربت نظام الشركة. قولي بقى، هو نظام الشركة بيقول إن العامل يشتغل تمنتاشر ساعة متواصلة من غير بريك؟" مدحت بدأ يعرق ووشه اتقلب ألوان: "يا فندم.. الوردية التانية مجتش، وأنا كنت خايف الإدارة تشتكي من النظافة بكره الصبح، فقلت لرضوى تساعدنا شوية.." "تساعدنا شوية؟ ولا هددتها لو مكملتش متجيش يوم الإثنين؟" نبرة عاصم بدأت تعلى، والهيبة اللي في صوته خلت مدحت يترعش. "أنا.. أنا كنت بحمسها بس يا فندم.. الشغل شغل وحضرتك عارف.." "لأ مش عارف!" عاصم زعق، والصوت هز الحيطان الزجاجية للمكتب. "الشغل مش استعباد! الشغل مش إنك تدوس على جثث الغلابة عشان تبان قدامي إنك المشرف المثالي! انت عارف الست دي بقالها تمنتاشر ساعة واقفة على رجليها عشان تاخد كام في الآخر؟ مية وتلاتين جنيه! وانت قاعد في مكتبك تحت التكييف بتاخد كام؟" مدحت سكت ومقدرش ينطق. عاصم لف وضهره لمدحت وقال: "مدحت.. انت حسابك هيتقفل النهاردة في الشؤون القانونية. من بكره الصبح انت ملكش مكان في الشناوي جروب." مدحت اترمى تحت رجل عاصم تقريباً: "بأيدك يا عاصم بيه! أنا عندي كوم عيال ومصاريف ومديون.. بلاش طرد يا فندم، أنا أسف والله مش هكررها تاني!" رضوى وقفت بسرعة واتدخلت وصوتها مخنوق بالدموع: "عاصم بيه.. عشان خاطري وخاطر عياله بلاش تطرده. انقل مكن تاني، جازيه.. بس بلاش قطع عيش. أنا مسامحاه والله مسامحاه." عاصم بص لرضوى، وبص لمدحت اللي واقغ ذليل قدامه. حس بإن الدنيا دي غريبة جداً، القوي فيها بيذل الأضعف منه، ولما القوي يقع، الغلبان هو الوحيد اللي بيحن عليه. عاصم أخد نفس طويل وقال لمدحت: "انت هتنزل درجة وظيفية من بكره. مش هتبقى مشرف. هتنزل تشتغل في الحركة والنقل تحت، ومرتبك هيتخصم منه الربع لمدة تلات شهور. والربع ده هيروح لصندوق مساعدات العمال. لو شفتك بتتعامل بتعالي مع أي عامل تاني، طرد فوري ومن غير مستحقات. سامع؟" مدحت وطى راسه وباس إيد عاصم: "سامع يا فندم.. كتر خيرك.. كتر خيرك يا بيه." "اطلع بره دلوقتي." عاصم قالها بقرف. مدحت جري بره المكتب وكأنه هرب من حبل المشنقة. المكتب رجع هادي تاني. عاصم بص لرضوى اللي كانت بتعيط بإنكار من كتر الضغط العصبي اللي عاشته في الكام ساعة دول. مشي ناحية مكتبه، وسحب الكرسي الجلد الكبير، وبص لرضوى وقالها: "اقعدي هنا يا رضوى." رضوى اتخضت: "تاني يا بيه؟ لا خلاص أنا والله.." "اقعدي.. الكرسي ده من النهاردة مابقاش بتاعي لوحدي. الكرسي ده هيبقى رمز لإن أي حد تعبان في الشركة دي ليه حق يرتاح فيه." عاصم قالها بابتسامة حقيقية لأول مرة تظهر على وشه من سنين. قعدت رضوى، والمرة دي سابت ضهرها يرتاح على الجلد الناعم. عاصم قعد قدامها على الكرسي التاني الصغير، وعكس الأدوار تماماً. "من بكره الصبح يا رضوى، انتي مش هتمسكي مقشة تاني في الشركة دي." عاصم قال بوضوح. رضوى قلقت: "يعني إيه يا بيه؟ هتطردني برضه؟" "لأ.. انتي قلتي معاكي دبلوم تجارة وبتفهمي في الحسابات. من بكره هتروحي لإدارة الحسابات في الدور العاشر. هتبدأي تدريب هناك كمعاونة حسابات أرشفة وتدقيق. ومرتبك مش هيبقى مية وتلاتين جنيه في اليوم. مرتبك هيبقى خمس تلاف جنيه في الشهر، وتأمين طبي شامل ليكي ولعيالك." رضوى بحلقت في عاصم وكأنها بتسمع كلام بلغة تانية مش فاهماها. الدموع وقفت في عينيها من الصدمة. "خمس تلاف جنيه؟ وتأمين؟ أنا يا بيه؟" "انتي يا رضوى. اللي يصون كرامته في عز تعبه، ويحن على اللي ظلمه وهو في عز كسرتة، يستاهل يكون في مكان أحسن بكتير. الشركة دي كبرت بأكتاف ناس زيك، وجه الوقت إن الناس دي تاخد حقها." رضوى قسماً بالله مكنت مصدقة. نزلت من على الكرسي وسجدت في الأرض تبكي وتشكر ربنا بصوت عالي، دموع الفرحة والفرج بعد الضيق. وعاصم واقف باصص ليها، ولأول مرة يحس بمعنى النجاح الحقيقي. النجاح مش أرقام في البنك، النجاح هو إنك تكون سبب في إن بني آدم ينام مطمن إنه مش هيتهان بكره. "قومي يا رضوى.. اطلعي على بيتك دلوقتي، وفيه عربية من عربيات الشركة هتوصلك لحد باب بيتك. ومن يوم الإثنين، أشوفك في الدور العاشر ببدلة جديدة وشغل جديد." رضوى مسحت دموعها بطرف طرحتها، وبصت لعاصم بكل امتنان: "ربنا يجبر بخاطرك يا عاصم بيه زي ما جبرت بخاطري وخاطر عيالي. ربنا يزيدك من نعيمه." خرجت رضوى من المكتب، مشيتها كانت خفيفة مفيش فيها التعب بتاع الـ 18 ساعة. كأن الهم انزاح من على كتافها فبقت بتطير. عاصم رجع قعد على كرسيه الكبير. بص للمكتب الفاضي، وبص للنوتة بتاعته. الدنيا بره كانت بدأت تنور بنور الصبح الجديد. حس إن الهوا في المكتب بقى أخف، وإن الكرسي بقى أريح بكتير من الأول. من الليلة دي، شركة الشناوي مبقتش زي الأول. عاصم غير القوانين كلها، وبقى فيه حد أقصى لساعات الشغل، ونظام مكافآت للعمال الغلابة قبل الموظفين الكبار. والكرسي الجلد؟ فضل موجود في مكتبه، بس مابقاش "مقدس" ولا ممنوع اللمس. بقى أي عامل يدخل لعاصم بيه عشان يطلب حاجة، عاصم بنفسه يقوم ويقعده عليه، عشان يفكر نفسه دايماً إن الكراسي بتروح وتيجي، بس السيرة الطيبة والعدل هما اللي بيعيشوا.تمت.. مشيره محمد