ممـ.ـنوع تحبيني

رهف قالت له ايه هي. زياد بص لها في عنيها وقال اني قابلتك متأخر اوي. لو كنت قابلتك من بدري كنت هحبك بجد. بس دلوقتي ممنوع احبك. وممنوع تحبيني.

رهف قامت من مكانها وهي مصدومة من الكلمة. قالت له انت بتقول ايه. زياد قال بقول الحقيقة اللي كنت مخبيها من اول يوم دخلت فيه هنا. انا اول ما شوفتك وانتي بتزعقي وبتشخطي حبيتك. حبيت كبرياءك وبرودك. حبيت انك مش زي اي بنت شفتها. كنتي بتفكريني بأمي. كانت قوية زيك كده. عشان كده كنت بعاكسك كل يوم. كنت عايز اشوف ضحكتك مرة واحدة قبل ما اموت. بس خلاص دلوقتي عرفت انك هتزعلي لو عرفتي حكايتي فكنت بحاول ابعد.

من اليوم ده كل حاجة اتغيرت. رهف ما بقيتش التلاجة. بقت تروح لزياد كل يوم بعد مواعيد الشغل وتقعد معاه بالساعات. تتكلم معاه. تضحك معاه. تحكيله عن حياتها وهي عمرها ما حكت لحد. حكت له انها كانت مخطوبة لمهند من خمس سنين ومهند سابها عشان قالها انتي قلبك ميت وما بتحبيش حد غير شغلك. ومن ساعتها وهي قفلت قلبها وقالت مش هحب تاني. زياد كان بيسمعها وبيطبطب عليها بكلامه.

يمنى كانت ملاحظة التغيير ده. قالت لها خدي بالك يا رهف انتي بتقعي. رهف قالت لها انا عارفة بس مش قادرة امنع نفسي. اول مرة في حياتي احس اني عايزة حد يبقى جنبي. اول مرة احس اني خايفة اخسر حد. زياد علمني اضحك. علمني اعيش.

زياد حالته بدأت تسوء. بقى يتعب بسرعة. بقى ينهج لو مشي خطوتين. رهف كانت بتموت كل يوم وهي شايفاه بيتألم قدامها ومش قادرة تعمل حاجة. كانت بتسهر جنبه في المستشفى طول الليل. تمسك ايده وهو نايم. في مرة وهو تعبان جدا قالها رهف انا عايز اطلب منك طلب. قالت له اطلب اي حاجة. قالها عايز اخرج من المستشفى يوم واحد بس. عايز اروح البحر. انا بحب البحر اوي ونفسي اشوفه اخر مرة.

رهف في الاول رفضت عشان حالته خطر. بس بعد كده وافقت. خدت اجازة من المستشفى واخدته مع يمنى ودينا ومهند صاحبه وراحوا اسكندرية. كان يوم حلو اوي. زياد كان مبسوط زي العيل الصغير. قعد على الرمل وبص للبحر وقال لرهف عارفة يا رهف انا طول عمري بخاف من البحر عشان غويط. بس دلوقتي مش خايف. عشان معايا انتي. رهف ضحكت وعيطت في نفس الوقت. زياد مسك ايدها وقال لها انا بحبك يا رهف. حتى لو ممنوع تحبيني انا هفضل احبك لحد اخر نفس فيا.