ياامي تعالي

وقعت الكلمة عليهم زي الصاعقة. في ثانية واحدة، الضحكة الباردة اللي كانت على وش “شريف” اتمسحت، والسيجارة اتفلتت من إيد “حسام” ووقعت على الأرض، أما “الحاجة ليلى” فملامحها اتخشبة والعقد اللولي اللي محاوط رقبتها حسيت إنه بيخنقها بجد. الصمت اللي حل في العنبر كان مرعب، لدرجة إن صوت أنفاس “ندى” الباكية كان هو الوحيد اللي مسموع وسط ذهول الدكاترة والممرضات اللي واقفين يتابعوا المشهد من بعيد. “شريف” وشه جاب ألوان، وبص لـ “ندى” بعيون مليانة غل وخوف وصرخ فيها: “تسجلي إيه يا بت أنتِ؟ أنتِ اتجننتي؟ دا أنا أوديكي في داهية وأمحيِك من على وش الأرض!”، ولسة بيمد إيده ويمشي خطوة ناحية السرير عشان يمسكها من دراعها، كنت أنا أسرع منه. حطيت إيدي في صدره وزقيته زقة خفيفة بس كانت كفيلة تخليه يرجع لورا تلات خطوات ويخبط في التروللي اللي وراه. عيني جت في عينه، وبصوت واطي ومسمم قولتله: “الخطوة الجاية لو خطيتها ناحية بنتي، هعتبرها اعتداء على مأمور ضبط قضائي أثناء تأدية وظيفتها.. وأقسم بالله يا شريف، هخلي عساكر المديرية يسلوا صيامهم عليك الليلة دي في الحجز”. “الحاجة ليلى” حاولت تلم الموضوع بسرعة لما لقت الموقف بيضيع من إيديهم، قربت وعلت صوتها وقالت: “جرى إيه يا سيادة العقيد؟ هتعملي علينا ليلة وتستغلي منصبك؟ بنتك كدابة ومفيش معاها حاجة، دي تلاقيه تليفون لعبة بتهددنا بيه! وبعدين تعالي هنا يا ندى، تسجيل إيه اللي بتتكلمي عنه؟ أنتِ ناسية إنك في بيتي؟ يعني لو فيه تسجيل بجد يبقا دي جريمة انتهاك حرمة مسكن واعتداء على الخصوصية، وإحنا اللي هنحبسك!” بصيت للست دي بنظرة سخرية تامة، وقولتلها: “قانون العقوبات يا حاجة ليلى مبيحْميش الجريمة تحت غطاء الخصوصية. لما بنتي تكون بتتنكل بيها وتتضرب وتتحبس، من حقها تدافع عن نفسها وتثبت الواقعة بكل الطرق. والتسجيل ده مش انتهاك، ده دليل جنائي لإنقاذ حياة”. التفت لـ “ندى” وحضنت وشها بإيديا الاتنين، وقولتلها بصوت حنين بس قوي: “التليفون فين يا قلب أمك؟” “ندى” حطت إيدها ببطء جوة جيب سحري مدفون في بطانة الفستان الأبيض المتبهدل، وطلعت موبايل صغير أسود، الشاشة بتاعته كانت لسة منورة، وعداد التسجيل الصوتي شغال وبيعد الساعات والدقايق. “ندى” داست “إيقاف وحفظ”، وبصتلي وعينيها مليانة دموع وقالت: “كل حاجة هنا يا ماما.. صوت شريف وهو بيشتمني ويضربني بالقلم، وصوت حسام وهو بيجرني من شعري على السلم، وصوت الست دي وهي بتقولهم اضربوها في مكان ميظهرش عشان المحاضر.. وصوتهم وهم بيقفلوا عليا باب الأوضة ويخدوا تليفوني الأساسي”. لما سمعت الكلام ده، حسيت إن فيه جمرة نار ولعت في صدري، بس مسكت نفسي بقمة الثبات الانفعالي اللي اتعلمته في السنين الطويلة في الخدمة. لفيت ليهم والتليفون في إيدي، وقولتلهم: “الدليل بقا معايا.. والمشهد السينمائي اللي كنتوا بتضحكوا عليه، هيتحول لفيلم وثائقي هتشوفوه بنفسكم في النيابة العامة”. “حسام” حاول يعمل فيها سبع ورجال، وقرب وهو بيجز على سنانه وقال: “أنتِ فاكرة نفسك مين يا ست أنتِ؟ الموبايل ده مش هيفضل معاكي ثانية واحدة، وإحنا لو كلمنا وزير الداخلية دلوقتي هيقعدك في بيتك!” قبل ما ينطق الكلمة الأخيرة، كنت سحبت اللاسلكي من حزامي ودوست على الزرار، وقولت بصوت جهوري هز المستشفى: “المركز.. من العقيد ميرفت السعدني. ابعتوا لي قوة حالا على مستشفى السلام الدولي، طوارئ الدور الأرضي. معايا حالة اعتداء وحبس حرية، والمشكو في حقهم متواجدين في المكان وثابتين.. حالا يا مركز!” جالهم الرد في ثانية من اللاسلكي: “علم يا فندم، القوة القريبة من الموقع متحركة حالا، خمس دقايق وتكون عندك”. الصوت اللي طلع من اللاسلكي كان زي حكم الإعدام على نبرة التعالي اللي كانت عندهم. “شريف” بدأ يعرق، وبص لأمه بخوف وقال: “ماما.. اتصرفي، كلمي المستشار فلان، أو كلمي عمي اللواء متقاعد.. بسرعة يا ماما!” “الحاجة ليلى” طلعت موبايلها بسرعة وهي إيدها بترتعش، وبدأت تتصل، بس الغرور لسة عايم على وشها، وقالتلي: “هندمك يا ميرفت.. هخليكي تخسري شغلك وتتحولي للتحقيق بتهمة التعدي على مواطنين واستغلال النفوذ”. وقفت بكل ثقة وحطيت إيدي في جنبي وقولتلها: “وريني هتكلمي مين.. أعلى ما خيلكم اركبوه. بس افتكري كويس.. النفوذ اللي بتتحاموا فيه ده بيمشي لما تكون القضية خناقة أو مشكلة عادية، لكن لما تكون القضية فيها تقرير طبي لشرطة نسائية، وتسجيلات صوتية لضرب وسحل وحبس حرية، وتهديد لضابط شرطة.. مفيش مسؤول في البلد دي هيجازف بكرسيه عشان يغطي على شوية بلطجية فاكرين نفسهم فوق القانون بسبب فلوسهم”. في أقل من خمس دقايق، المستشفى اتقلبت. صوت سرينة عربية البوكس وصوت فرامل عربيات الشرطة سمعناه برا الطوارئ. دخل العنبر ملازم أول ومعه أربع عساكر مجهزين، أول ما شافوني وقفوا انتباه وضربوا التحية العسكرية: “تمام يا فندم! القوة جاهزة”. شاورت بصباعي على “شريف” و”حسام”: “اقبضوا على الاتنين دول.. والست دي تطلع معاهم على القسم بدون أي شوشرة، والكل يتحفظ عليه لحين تحرير المحضر”. “شريف” صرخ: “أنتِ بتعملي إيه؟ أنا شريف علام! أنت مش عارف أنت بتقبض على مين يا عسكري أنت وهو؟” الملازم الأول بكل حسم قال: “اتفضل معانا من غير كلام، الحركة دي في المستشفى ممنوعة”. العساكر كلبشوا “شريف” و”حسام” وسط ذهول وكسرة نفس مكنوش يتخيلوها. “الحاجة ليلى” كانت بتبصلي بعيون مليانة شر ووعيد وهي ماشية وراهم وبتقول بصوت مكتوم: “مش هنسيبك.. والله ما هنسيبك يا ميرفت، والفلوس اللي بتستهوني بيها دي هتحطك أنتِ وبنتك في السجن”. مشيت القوة بالمتهمين، وأنا لفيت لـ “ندى” اللي كانت لسة بترتعش. قعدت جمبها على السرير وخدتها في حضني تاني وقولتلها: “خلاص يا قلب أمك.. كابوسهم انتهى، طول ما أنا فيا النفس مفيش كلب يقدر يمس شعرة منك”. طلبت دكتور الطوارئ وقولتله بحزم: “عايزة تقرير طبي وافي ومفصل بكل الإصابات اللي في جسم بنتي. الكدمات، السحجات، الجرح اللي في شفتها، وعايزة دكتور رمد يشوف عينيها الورمة دي. التقرير ده هيطلع فوراً ويتختم بختم المستشفى عشان هيترفق بالمحضر”. الدكتور هز راسه بسرعة وقال: “حاضر يا فندم، ربع ساعة وكل حاجة هتكون جاهزة”. طول الربع ساعة دي، وأنا قاعدة جمب “ندى”، كنت بفكر في الخطوة الجاية. عيلة “علام” مش ناس سهلة بجد، الفلوس والنفوذ والعلاقات ممكن يخلوا القضية دي تختفي من الدفاتر لو أنا غفلت ثانية واحدة. التسجيل اللي مع “ندى” هو ورقتنا الرابحة، بس لازم أأمنه. طلعت موبايلي ونقلت التسجيل كله عن طريق “الواتساب” و”الإيميل” لتلاتة من زمايلي الضباط اللي بثق فيهم عمى، وبعت نسخة تانية لـ “فلاشة” صغيرة كانت معايا في شنطتي. لما التقرير الطبي طلع، أخدت “ندى” وركبنا عربيتي، وطلعنا على القسم. أول ما دخلت، رئيس المباحث وقف ورحب بيا: “أهلاً يا سيادة العقيد، خير إيه اللي حصل؟ القوة جابت عيلة علام وحاطينهم في المكتب جوا، والبلد مقلوبة، تليفونات جاية لنا من كل حتة عشان نلم الموضوع”. قعدت “ندى” على الكرسي وبصيت لرئيس المباحث وقولتله ببرود: “الموضوع مش هيتلم يا أحمد. دي قضية شروع في قتل، وحبس حرية، وتعذيب. التقرير الطبي اهو، والتسجيلات الصوتية للواقعة كاملة معايا اهي. افتح المحضر فوراً، وبنتي هتدلي بأقوالها”. أحمد بص للتقرير والتسجيلات وشه وتغير، وقال بصوت واطي: “يا فندم، الست ليلى كلمت ناس تقال قوي في الوزارة، والتعليمات اللي جاية بتقول نحاول نعمل صلح والمسائل تمشي ودي”. ضربت بإيدي على المكتب بعنف لدرجة إن الحبر اتهز: “صلح إيه ودي إيه يا أحمد؟! أنت شايف بنتي متبهدلة إزاي؟ أنا عقيد في الشرطة، يعني كرامتي من كرامة الوزارة دي! لما عيلة تفتكر إنها تقدر تدوس على بنتي وتهددني برتبتي، يبقا مفيش صلح. المحضر هيتفتح وهيتحول للنيابة الليلة دي، ولو حد حاول يتدخل أو يعطل المحضر، أنا هطلع بالتسجيلات دي لمعالي الوزير بنفسي، وهنشرها على السوشيال ميديا و أخليها قضية رأي عام ومبقتش فارقة معايا وظيفتي قصاد حق بنتي!” رئيس المباحث حس بجدية كلامي وعرف إن ميرفت السعدني لما بتقلب بتبقا إعصار مبيقفش قدامه حد. هز راسه وقال: “حاضر يا فندم، فتح المحضر حالا”. قعدنا تلات ساعات كاملة بنسجل الأقوال. “ندى” حكت كل حاجة بالتفصيل؛ من أول ما “شريف” بدأ يتغير معاها بعد الجواز بشهرين ويتحكم في خروجها ودخولها، لحد الليلة المشؤومة دي لما سمعها بتتكلم معايا في التليفون وبتشتكي من أسلوب أمه البايخ، فدخل عليها الأوضة وسحب منها التليفون وضربها، ولما حاولت تهرب، أخوه “حسام” وقفها على السلم وزقها وسحلها مع أخوه لحد أوضة الشغالين في السطوح وقفلوا عليها، وأمه كانت واقفة تتفرج وبتقولهم: “أدبوها عشان تعرف إن بيوت الأكابر ليها أصول”. بعد ما المحضر خلص وتم إرفاق الفلاشة اللي عليها التسجيلات والتقرير الطبي، رئيس المباحث أمر بإحالة المتهمين للنيابة الصبح باكر مع استمرار تحفظهم في الحجز. لما خرجت من مكتب المباحث، لقيت محامين عيلة “علام” ماليين الطرقة، ومعاهم ناس كبار من معارفهم. واحد منهم قرب مني، راجل عجوز ببدلة غالية ونظارة ذهب، وقال بصوت هادي وخبيث: “سيادة العقيد ميرفت.. إحنا مقدرين زعلك كأم، وده حقك طبعاً. بس العند بيخسر. الست ليلى وشريف وحسام مستعدين يعتذروا، وندى هتاخد مؤخرها كامل، وفوقيه شقة تمليك في الزمالك هدية ترضية ليها، والموضوع ينتهي طلاق بالمعروف من غير فضايح في النيابات. فكري كويس، القضية لو راحت النيابة، إحنا برضه لينا طرقنا، والخراب هيطول الكل”. بصيت للمحامي وقولتله وأنا ماشية وسيباه: “الشقة اللي بتتكلم عنها دي، يجهزوها لشريف وحسام عشان يقعدوا فيها لما ياخدوا حكم بالسجن المشدد. سلام يا متر”. أخدت “ندى” ورجعنا بيتنا. البيت اللي كان هادي وفاضي بقاله تمن شهور. دخلتها أوضتها القديمة، غيرت لها هدومها المتبهدلة، وعملت لها كمادات على عينيها وشفتها المجروحة. “ندى” نامت من كتر التعب والمهدئات اللي أخدتها في المستشفى، وأنا فضلت قاعدة جمبها، باصة للسقف وعقلي مش مبطل تفكير. أنا عارف إن المعركة الحقيقية هتبدأ الصبح في النيابة. تاني يوم الصبح، الساعة كانت تمنية. لبست بدلتي الميري تاني، ونزلت مع “ندى” والمحامي بتاعنا على مقر النيابة الكلية. المكان كان زحمة جداً، وعيلة “علام” كانوا جايبين تمن محامين من كبار رجال القانون في مصر، والست “ليلى” كانت قاعدة في الاستراحة ووشها أصفر بس لسة بتحاول تظهر قوية وثابتة. دخلنا لمكتب وكيل النيابة، راجل شاب بس ذكي وعينيه حادة، اسمه الأستاذ “ياسر جلال”. بدأ التحقيق مع “ندى” الأول، وسمع منها الأقوال، وشاف التقرير الطبي. وبعدين طلب يسمع التسجيلات الصوتية. لما التسجيل اشتغل في المكتب، وصوت “شريف” وهو بيشتم بأقذع الألفاظ وصوت الضرب وصرخات “ندى” وهي بتستغيث طلعوا من السبيكر، الهدوء ساد المكان. وكيل النيابة ملامحه اتغيرت وبقت صارمة جداً. قفل التسجيل وبص للمحامي بتاعنا وقال: “التسجيل ده واضح ومفيهوش أي لبس، ومطابق تماماً للإصابات المذكورة في التقرير الطبي”. بعدها تم استدعاء “شريف” و”حسام”. دخلوا المحبس وهما متبهدلين، قلة النوم والبهدلة في الحجز ليلة كاملة ضيعت الفشخرة والمنظرة اللي كانوا فيها. وكيل النيابة واجه “شريف” بالتسجيل: “ده صوتك وأنت بتعتدي بالضرب على زوجتك المجني عليها ندى السعدني؟” “شريف” بدأ يتلعثم وقال: “لأ يا فندم.. ده مش صوتي، التسجيل ده متفبرك وبالذكاء الاصطناعي، دي أمها ضابطة شرطة وتقدر تعمل أي حاجة عشان تتبلى عليا وتدمر مستقبلي وتملي شروطها في الطلاق!” المحامي بتاعهم اتدخل وقال: “يا فندم، ندفع ببطلان الدليل المستمد من التسجيل الصوتي لعدم صدور إذن من النيابة العامة بالتسجيل، وبناءً عليه نطالب بإخلاء سبيل المتهمين بضمان مالي”. وكيل النيابة بص للمحامي وقال بحسم: “الدفع ببطلان التسجيل مردود عليه؛ لأن المجني عليها كانت في حالة دفاع شرعي عن النفس وفي حالة تلبس بالجريمة من قبل المتهمين، والتسجيل تم أثناء ارتكاب الجريمة لمنع تفاقمها وإثباتها، وهو ما استقرت عليه محكمة النقض المصرية في حالات الضرورة القصوى لحماية الحق في الحياة والسلامة الجسدية. أما بخصوص الفبركة، فالنيابة العامة هتحيل التسجيل لقطاع الهندسة الإذاعية بالتلفزيون المصري لإعداد تقرير فني بمدى صحته ونسبته للمتهمين”. التفت لـ “حسام” وواجهه بأقوال “ندى” وتورطه في السحل والحبس. “حسام” انهار تماماً وبدأ يعيط ويقول: “أنا ماليش دعوة يا فندم! شريف هو اللي كان بيضربها، أنا بس كنت بحجز بينهم وبمنعها تخرج برا الفيلا عشان الجيران متتلمش علينا وتعمل لنا فضيحة!” “شريف” بص لأخوه بصدمة: “أنت بتبيعني يا حسام؟ أنت مش كنت بتساعدني وتقولي أدبها؟” التحقيق استمر لساعات طويلة، وتم استدعاء “الحاجة ليلى” كمان للتحقيق معاها بتهمة التحريض والاشتراك في حبس حرية المجني عليها. الست اللي كانت من كام ساعة بتهددني بالنفوذ والفلوس، كانت واقفة قدام وكيل النيابة وإيدها بترتعش وهي بتحاول تدافع عن نفسها وتقول إنها كانت بتحاول تصالح بينهم وإن “ندى” هي اللي رمت نفسها من على السلم في نوبة غضب. على الساعة أربعة العصر، خرج سكرتير التحقيق وقرأ القرار اللي نزل كالصاعقة على عيلة “علام” ومحامينهم: “قررت النيابة العامة أولاً: حبس المتهمين شريف علام وحسام علام أربعة أيام على ذمة التحقيق، ويراعى التجديد لهم في الميعاد المحدود، بتهم الشروع في القتل، والضرب المفضي إلى إصابات بالغة، وحبس الحرية بدون وجه حق. ثانياً: إخلاء سبيل المتهمة ليلى علام بضمان مالي قدره خمسون ألف جنيه بتهمة الاشتراك والتحريض. ثالثاً: إحالة التسجيلات الصوتية الخاضعة للحفظ إلى مصلحة الخبراء لفحصها بصورة عاجلة”. لما سمعت القرار، حسيت إن فيه جبل انزاح من على صدري. “ندى” عيطت من الفرحة وهي مش مصدقة إن حقها رجع بالسرعة دي، وإن الناس اللي كانوا فاكرين نفسهم آلهة في البلد دي، بقوا دلوقتي ورا القضبان وهيتم ترحيلهم على سجن التخشيبة مع المجرمين الجنائيين. “الحاجة ليلى” لفت عليا وعينيها مليانة شر ملوش آخر، قربت مني وقالت بصوت فحيح الأفاعي: “فرحانة قوي يا ميرفت؟ فاكرة إنك كسبتي؟ الأربعة أيام دول هيعدوا، وإحنا هنطلع بكفالة أو في التجديد، والفلوس اللي معايا هشتري بيها كل حاجة.. هشتري بيها تقرير الطب الشرعي، وهشتري بيها خبير الأصوات، وهطلع عيالي زي الشعرة من العجين. ويوم ما يخرجوا.. مش هسيب فيكم حتة سليمة، وهتشوفي عيلة علام هتعمل فيكي إيه أنتِ وبنتك!” بصيت لها بكل ثبات، ومسكت إيد بنتي وقولتلها: “أعلى ما في خيلك اركبيه يا ليلى.. الميدان بيننا، والقانون اللي أنتِ مستهونة بيه، هو اللي هيحط عيالك في قفص الاتهام بالبدلة البيضا”. عدت الأيام الأربعة، وكنت بتابع القضية دقيقة بدقيقة. تقرير الهندسة الإذاعية جه وجاء في صالحنا تماماً؛ أكد إن البصمة الصوتية في التسجيل مطابقة بنسبة مية في المية لصوت “شريف” و”حسام” و”ليلى”، ومفيش فيه أي تدخل أو فبركة. التقرير الطبي الشرعي النهائي أكد إن الإصابات اللي في جسم “ندى” متطابقة مع زمن الواقعة ومع أداة الاعتداء (الأيدي والأرجل والجر على جسم صلب). في جلسة التجديد، القاضي لما شاف اكتمال الأدلة وتقرير الخبراء والتسجيلات، رفض إخلاء السبيل وجدد حبس “شريف” و”حسام” خمسة عشر يوماً على ذمة التحقيق، وتم إحالة القضية بأكملها بصفة عاجلة إلى محكمة الجنايات. البلد كلها بدأت تتكلم عن القضية. الصحافة اللي “الحاجة ليلى” كانت بتقول إنها تملكها، انقلبت عليهم. لما القصة اتسربت والتسجيلات الصوتية (التي تم حجب الألفاظ الخارجة منها) انتشرت جزئياً كأدلة اتهام، الرأي العام اتقلب ضد عيلة “علام”. شركات المقاولات بتاعتهم خسرت أسهمها في البورصة، والمستشفيات بتاعتهم بقت تعاني من مقاطعة الناس، وبقى اسمهم مرادف للبلطجة والافتراء. يوم المحاكمة الأولى في محكمة جنايات القاهرة.. المحكمة كانت متقفل كوردون أمني بسبب زحمة الصحفيين وأهالي المنطقة المهتمين بالقضية. قعدت أنا و”ندى” في الصف الأول. “ندى” كانت بدأت تخف، الكدمات اللي على وشها راحت، بس الندبة الفيسولوجية والنفسية لسة جواها، لكن عينيها مكنتش خائفة زي الأول.. كانت مليانة قوة، مستمدة من وجودها جمبي. دخل المتهمون قفص الاتهام. “شريف” و”حسام” بالبدلة البيضا، وشهم في الأرض، شعرهم محلوق، وضاع كل أثر للغرور والشياكة والتكبر. “الحاجة ليلى” كانت قاعدة في قاعة المحكمة على جنب، وشها عجوز وتعبان، ملامحها مكسورة وهي بتشوف عيالها ورا القضبان زي أي مجرمين عتاولة. المحامين بتوعهم حاولوا بكل الطرق يلاقوا ثغرة؛ دفعوا بتناقض الأقوال، دفعوا بكيدية الاتهام من طرفي بصفتي ضابطة شرطة، ودفعوا بإن التسجيلات تم الحصول عليها بطريقة غير قانونية. لكن النيابة العامة ألقت خطبة نارية أبكت الحاضرين في القاعة؛ وكيل النيابة اتكلم عن مفهوم الزواج وسكن الحياة، وإزاي تحول لزنزانة تعذيب، واتكلم عن شجاعة الضحية اللي وثقت جريمتهم، وعن كرامة القانون الصارم اللي مبيفرقش بين غني وفقير أو صاحب نفوذ ومواطن بسيط. بعد المداولة التي استمرت لساعتين كاملتين.. ساد الصمت التام في القاعة مع دخول هيئة المحكمة. وقف الجميع، ونطق قاضي الجنايات بالحكم بصوت جهوري زلزل القاعة: “حكمت المحكمة حضورياً وبإجماع الآراء: أولاً: بمعاقبة المتهم الأول شريف علام بالسجن المشدد لمدة سبع سنوات عما أسند إليه من تهم الشروع في القتل والضرب المفضي لعاهة مستديمة جزئية وحبس الحرية. ثانياً: بمعاقبة المتهم الثاني حسام علام بالسجن المشدد لمدة خمس سنوات للاشتراك في الجريمة واستخدام القوة وسحل المجني عليها. ثالثاً: بمعاقبة المتهمة الثالثة ليلى علام بالسجن مع الشغل لمدة سنتين بتهمة التحريض والمساعدة على حبس الحرية والتعذيب البدني.. والزامهم جميعاً بالمصاريف الجنائية وإحالة الدعوى المدنية للمحكمة المختصة”. في اللحظة دي، القاعة انفجرت بصوت الهتافات وزغاريط من بعض الحاضرين المتعاطفين. “الحاجة ليلى” وقعت على الأرض مغمى عليها من الصدمة، و”شريف” قعد في أرضية القفص وحط إيده على راسه وهو بيعيط بهستيريا، وأخوه بيصرخ ويسبه ويقوله: “دمرتني ودمرت العيلة بغرورك!”. بصيت لـ “ندى”، لقيت دموعها بتنزل، بس المرة دي كانت دموع النصر والراحة. خدتها في حضني وقولتلها: “قولتلك يا بنتي.. النسر اللي على كتفي ده مش مجرد زينة، ده رمز للعدل اللي مبيسبش مظلوم، والرخام الغالي بتاعهم مأكلش مع القانون”. خرجنا من باب المحكمة وسط فلاشات كاميرات الصحفيين، وكنت حاسة بفخر ملوش مثيل. رجعنا بيتنا، وأنا حاسة إن رسالتي كأم وكضابطة اتأدت على أكمل وجه. عدى شهرين على الحكم. الحياة بدأت ترجع لطبيعتها، “ندى” رفعت قضية طلاق للضرر وأخدت حكم سريع بطلاقها بطلقة بائنة مع الاحتفاظ بكافة حقوقها الشرعية والمادية، وبدأت ترجع لشغلها وحياتها وسط أصحابها، والضحكة رجعت تنور وشها تاني. في يوم من الأيام، كنت قاعدة في مكتبي بمديرية الأمن، بخلص شوية تقارير وقضايا جديدة. الدنيا كانت هادية، والساعة كانت تقترب من العاشرة مساءً. فجأة، تليفوني الشخصي رن.. برقم غريب مش متسجل عندي. فتحت الخط وقولت: “ألو.. مين معايا؟” جالي صوت نفس عميق، هادي وبارد جداً، صوت راجل غريب مسمعتوش قبل كدة، بس نبرته كانت تقبض القلب وتخلي شعر الإيد يقف. الصوت قال ببطء شديد: “مبروك كسبت الجولة الأولى يا سيادة العقيد ميرفت.. ومبروك سجن شريف وحسام والست ليلى. بس أنتِ فاكرة إن عيلة علام هما بس التلاتة دول؟ أنتِ ناسية إن ليلى ليها أخ كبير.. كان عايش برا ومتابع كل حاجة؟ الفلوس اللي أنتِ استهونتي بيها، لسة موجودة ومعايا أنا.. والحكم اللي فرحانة بيه ده، هيكون هو السبب في نهاية عيلتك كلها. جهزي نفسك.. لإن اللعبة الحقيقية، والضربة اللي بجد، لسة هتبدأ من الليلة دي.. وأول هدية ليكي، هتلاقيها دلوقتي حالا ورا باب بيتك اللي ندى قاعدة فيه لوحدها!” الخط قطع فجأة. حسيت ببرودة مرعبة بتسري في جسمي كله. عينيا وسعت من الرعب، واللاسلكي وقع من إيدي على المكتب.. تليفون البيت بتاع ندى مش بيرد.. سحبت مسدسي الميري وجريت على برا زي المجنونة وأنا بصرخ في العساكر: “ورايا على البيت حالا!”