امان مستعار
وفي الوقت نفسه، وفي الأيام اللي تلت خروج ليان من المركز بعد ما قفلت ملف مالك، كان الجناح الجديد لسه بيغلي بالشغل، وما مرتش الأيام التالية بهدوء كما حاول الجميع أن يوهم نفسه.
كان ياسين واقف لوحده تمامًا في طرقة الأرشيف الخلفية، منكب على الطاولة و بيقلب بلهفة وفضول في الملفات القديمة اللي كمال الشافعي أمر بنقلها.
على بُعد مسافة كافية في آخر الطرقة، كانت تاليا واقفة مع واحد من العمال، بتشاور له على حيطة و بتقيس بالمتر، مظهرة انشغال تام بشغلها الهندسي الروتيني، لكن عينيها كانت بتلمح حركة ياسين في صمت وتكتيك من غير ما تلفت النظر.
توقفت يد ياسين فجأة عند صفحة من تقرير قديم، و صدمته لما قرا اسم “حسان المحاسب”… وبدأ يقلب بسرعة وهو مستغرب قطع الصفحات اللي بعدها.
وفجأة… ضربت خطوات حادة وواثقة في الممر.
دخل كمال الشافعي.
عينه نزلت فورا على الملف المفتوح في إيد ياسين، وساد هدوء يخنق الأنفاس. قرب كمال بخطوات ثقيلة وقال بنبرة جافة وصارمة:
ـ بتعمل إيه بالملفات دي يا ياسين؟
ياسين اتوتر وسكت فورا وقفل التقرير:
ـ ولا حاجة يا عمي… كنت ببص على أوراق الأرشيف بالصدفة.
كمال سحب الملف من إيد ياسين بصرامة وقفل عليه بيده:
ـ الأوراق القديمة دي تخص فترة انتهت و اتقفلت من زمان… سيب الماضي في مكانه، وما تفتش في حاجة ما تخصكش.
التفت كمال بحدة، ولمح تاليا واقفة في آخر الممر بتسجل ملاحظات في كشكولها مع العامل وكأنها مش دارية بأي حاجة بتحصل حواليها. غادر كمال الممر وهو ماسك الملف بحدة، وياسين واقف مكانه بيغلي من الفضول والشك.
وفي اللحظة دي، رن هاتف ياسين بشدة.
فتح الخط، و جاءه صوت سليم المتوتر من الطرف الثاني:
ـ ياسين… تعالى المكتب حالا . لقينا اسم حسان ومحمود النوحي في ملف تاني، وفيه صفحة مفقودة من الحسابات.
ياسين رد بلهفة:
ـ أنا جاي لك فورا
ساب ياسين الأرشيف وجرى ناحية مكتب سليم بسرعة وعقله بيودي ويجيب.
أول ما الممر فضي تمامًا، واختفت خطوات ياسين وكمال…
مشيت تاليا العامل بهدوء، و لفّت وجت ناحية الطاولة اللي كان واقف عليها ياسين.
اختفت ملامح اللامبالاة المهنية فورا، وتحولت لبرود حاد. أخرجت من شنطتها الصفحة المفقودة الحقيقية بتاعة الحسابات… نفس الصفحة اللي هي سحبتها الصبح بدري من الملف قبل ما ياسين أو كمال يوصلوا للأرشيف، و سابت باقي التقرير الناقص قدام عين ياسين عشان يفتش و يتصدم، ويتصل بسليم ويشعل النار بين العيلة .
