امان مستعار
لبست بسرعة، و خدت شنطتها، ونزلت. نادتها نادية من المطبخ:
– رايحة فين يا ليان؟
وقفت لحظة:
– المركز.
خرج محمود من غرفته في نفس اللحظة تقريبًا:
– المركز؟!
بصت له بثبات رغم إن قلبها كان بيرتعش:
– أيوه.
– أنا قلت لك امبارح محدش يعتب المركز ده تاني.
– وأنا سمعتك.
– أمال رايحة ليه؟
– عشان أسمع الحقيقة.
– الحقيقة مش عند سليم.
– يمكن… ويمكن عنده جزء منها.
قرب محمود منها:
– ليان، أنا بحذرك.
– وأنا مش بتحداك يا بابا… بس أنا مش هقدر أعيش طول عمري على خوفك.
– أنا أبوكي.
– وعشان إنت أبويا، أنا مصدقة خوفك… بس مش هقدر أعتبره دليل.
الجملة نزلت على محمود كأنها صفعة. بص لها طويلا، ثم أبعد عينيه عنها:
– روحي… بس لو حصل لك حاجة، مش هسامح نفسي.
اقتربت منه وقبلت جبينه:
– وأنا مش عايزة أخسرك.
ثم خرجت.
ـــــــــــــــــــ
وصلت ليان إلى المركز الطبي وهي شاحبة، خطواتها تائهة، وعيناها تحملان خيبة حارقة وصدمة مش قادرة تستوعبها. عدت من الاستقبال من غير ما تبص لحد، طلعت السلم بسرعة، ووصلت للدور المخصص لمكتب سليم.
فتحت الباب واقتحمت الغرفة دون استئذان وبقلب مكسور.
في اللحظة دي، كان دكتور عمر الشريف واقف جنب مكتب سليم بيراجع معاه ملف، وبمجرد ما انفتح الباب و شاف منظر ليان ووجهها المرتجف والتوتر المشتعل في الهواء، حس عمر إن فيه حاجة أكبر من إنه يفضل موجود، انسحب بهدوء وسحب الباب وراه، وهو حاسس إن اللي جاي زلزال.
وقف سليم بدهشة، وعيونه اتسعت بقلق لما شاف حالتها:
– ليان؟! إيه اللي حصل؟ مالك يا ليان… وشك أصفر كده ليه؟ إنتِ كويسة؟
خطا ناحيتها بلهفة، بس ليان رفعت ايديها في الهواء بحدة تمنعه يقرب خطوة واحدة زيادة. كانت واقفة قدامه، ودمعة حائرة و ساخنة معلقة في طرف عينها، وقالت بصوت يرتجف و مخنوق من كثرة البكاء:
– دكتور سليم… أسألك سؤال واحد و تجاوبني بوضوح من غير ما تلف وتدور… كنت عارف أنا مين من أول يوم دخلت فيه المركز هنا؟ كنت عارف إن أنا بنت محمود النوحي؟
تغيرت ملامح سليم تمامًا، وظهر الذهول الصادق على وشه وهو بيبص لها ومش فاهم حاجة:
– إنتِ بتقولي إيه يا ليان؟! أنا عارف إنك ليان… طالبة الجامعة، وأخت مريم، وخالة مالك… إيه الكلام الغريب اللي بتسأليه ده؟ فيه إيه؟
صرخت ليان بآلام مكتومة، وصوت هز جدران المكتب، والدموع انفجرت من عينيها:
