زهراء
بعدها فؤاد خد الفلاشة وراح للمحامي بتاعه ورفع قضية على جابر والمحاسب القديم، والنيابة حققت وثبتت ان الاوراق مزورة وان فؤاد بريء من اغلب الديون، والبنك اداله مهلة يسدد الباقي، الشركة رجعت تقف على رجليها تاني، اول حاجة عملها فؤاد انه جمع كل الموظفين في الاجتماع وقال لهم انا كنت مدير مغرور وكنت بظلم ناس كتير واولهم زهراء، انا بعتذر لها قدامكم كلكم، وبعلن ان زهراء من النهاردة مش سكرتيرة، زهراء من النهاردة مديرة مكتبي وشريكتي في الادارة ومرتبها هيتضاعف تلات مرات، كل الناس سقفت وزهراء كانت بتعيط من الفرحة، ومريم صاحبتها كانت واقفة بتزغرط من الفرحة ومليكة بتحضنها ومحمد اخوها كان بيصورها بالموبايل.
ومع الايام فؤاد اتغير تماما، بقى انسان متواضع وبيساعد اي حد محتاج، وبقى يعامل زهراء كأنها اخته، وكان كل يوم يعدي عليها يطمن على امها ويبعت لها علاج على حسابه، ومحمد اخوها بقى يذاكر في مكتبة الشركة، ومريم صاحبتها اتعينت في مستشفى خاصة تبع فؤاد بمرتب كبير، ومليكة اختها فؤاد دفع لها مصاريف الجامعة، بقى ياخد رأي زهراء في كل كبيرة وصغيرة وبقى يسمع كلامها لما تقوله الموظف الفلاني غلبان زود له مرتبه، كان بيقول لها انتي ضميري اللي كان ميت وصحي، وزهراء بقت تحس انها اخيرا حد شايفها ومقدرها.
وفي يوم فؤاد طلب من زهراء يروحوا يتغدوا سوا، وهي فكرت انه شغل، لما راحوا مطعم بسيط على النيل قال لها يا زهراء انا عارف اني اقل منك كتير وانك بنت جدعة ومتربية وانا كنت مغرور، بس انا من يوم ما انقذتيني وانا شايفك بطلة، تتجوزيني، زهراء ضحكت وقالت له انت لسه مغرور بس مغرور طيب، موافقة بس بشرط تفضل متواضع، وفعلا بعد سنة اتجوزوا وعملوا فرح بسيط في الحارة بتاعتها وكل الناس فرحت لها، وعاشت زهراء مع فؤاد وهي معلماه ان الفلوس مش كل حاجة وان الكرامة اغلى من اي حاجة في الدنيا وان الفقير ممكن يكون اغنى واحد بأخلاقه وقلبه الابيض، وهو علمها ان مش كل الاغنيا وحشين وان فيه ناس بتتغير لما تلاقي اللي يحبها بجد، وعاشوا في سعادة بعد ما كل واحد فيهم اتعلم الدرس من التاني.
زهراء بعد ما بقت مديرة مكتب فؤاد حست ان المسئولية كبرت عليها اوي، بقت بتيجي من سبعة الصبح تراجع العقود وتقابل العملاء وتظبط مواعيد الشركة كلها، وفؤاد بقى معتمد عليها اعتماد كلي، كان يقول لها يا زهراء انا من غيرك ولا حاجة، انتي اللي رجعتي لي شركتي ورجعتي لي نفسي، وكانت بتضحك وتقول له يا فؤاد بيه بطل كلام الافلام ده، بس من جواها كانت فرحانة ان تعبها متقدرش اخيرا.
