نار وهدنه9
—————-
في المستشفى
وصل عمار بزمن يكاد لا يصدق، ترجل عز صارخا بغضب: انتو يا بهايم! حد ييجي يساعدنا بسرعة!
فتح عمار الباب الخلفي، هرول ياسر ورفاقه، يحملون راجح المتهاوي. اندفع المسعفون بسرير متحرك، وضعوه عليه، واتجهوا به إلى غرفة العمليات.
وقف الثلاثةأمام باب الطوارئ، محاولين لجم أعصابهم.
قال عز بحنق وهو يركل الأرض: في نص المنطقه؟! ده الوضع فلت خالص.
غمغم ياسر وهو يمسح وجهه المتعب:الأيام اللي جاية… لازم نفتح عينينا كويس.
اقترب عمار منهما وقال: تفتكروا مين اللي عمل كده؟!
رد عز بصوت خافت: أعداءنا كتير يا عمار… مش هنقدر نعرف غير لما راجح يحكي.
تنهد عمار وقال: ربنا يقومه بالسلامة… والباقي سهل.
رد ياسر بحنق متعطش للانتقام: يقوم بس… وعلي الطلاق اللي عمل فيه كده هشقه بالطول.
دخل العتال وعاشور وإبراهيم، يلهثون من الركض.
هتف العتال، قلبه يرتجف: ابني! ايه اللي حصل له؟!
أمسكه عز، وقال له بنبرة متماسكة رغم الغليان: اهدا يا عمي… راجح في العمليات، وربنا ياخد بإيده. ادعيله بس.
ترنح العتال في وقفته، وكاد يسقط، فأسنده عاشور وهتف: امسك نفسك يا عتال… راجح شديد، وربنا كبير.
قال عز وهو يجذبه ليجلس: اقعد يا عمي واستهدي بالله.
جلس العتال بصعوبة، وهمس بصوت متهدج:مين اللي عمل كده في أخوك يا عز؟
جثا عز على ركبته جواره، وقال ياسر بحزم: هنعرفه… واعتبره ميت من دلوقتي.
ربت عز على يد العتال وقال من بين فكيه، نبرته تقطر نذرًا: عليه الحرام يا عمي، هشرب من دمه… بس انت اهدا عشان صحتك.
نظر عاشور حوله بقلق: هو سلطان مكنش في الصاغه؟
هز عز رأسه بالنفي:لا يابا… سلطان مختفي من صباحية ربنا.
قال عاشور بجدية:كلمه يا عز، شوفه فين، وقوله ياخد باله… شكلها جايه علينا ايام سودا.
أخرج عز هاتفه، اتصل بسلطان… لكن الرد كان صفعة باردة:”الهاتف الذي طلبت مغلق أو غير متاح.”
أنزل الهاتف وقال: مقفول يابا.
ضرب عاشور الأرض بعصاه وهتف:جيب العواقب سليمة يا رب!
اقترب إبراهيم من عمار، وقال بهمس قلق: حتى ضي… مش في شقتها.
ارتجف قلب عمار، وقال بصوت متحشرج: أكيد مع سلطان.
قال إبراهيم:ولازم نتأكد… افرض مش معاه!
أخرج عمار هاتفه، اتصل بضي… مغلق.
أطبق فمه وقال بجدية:ربنا يستر… اطلع كلم علي، خليه يطلع يسأل عليها… يمكن عند حياة بيذاكروا سوا.
