السراب2

بقلم : إيمان عطية

الحلقة العشرون

بعد ما نهيت محادثتي مع زياد… قررت إنها غلطة لن تتكرر مجددا مهما حصل… حتى متابعتي لصفحته لغيتها… مش عارفة تفرق أيه إني أتابع شخص مجهول بالنسبالي عن متابعتي لزميل اكتشفت إنه حد محترم بعد ماكنت فاهمة غلط… مش عارفة ليه خفت الأمور تتطور بيننا وتتعدى إطار الزمالة داخل المدرسة فقط… كان جوايا إحساس بالخوف من أي علاقة عاطفية جديدة… كان الجرح جوايا لسة موجود لكن زي القنبلة الموقوتة مش عاوزة أكرر التجربة تاني ولا أعيش حالة الخذلان والتخلي وخيبة الأمل من جديد.. قررت أبعد نفسي عن الشبهات وأعيش لشغلي بس لحد ماتعدي السنة وارجع لأهلي ولحياتي اللي كنت متعايشة معاها…. ياسلاااام… قد أيه أنا مفتقدة العيشة اللي كنت شايفاها روتينية ومملة… وقد أيه بتمنى أرجع أعيشها من جديد… وكفاية عليا حضن أبويا وأمي….

بعد يومين لقيت روضة جيالي البيت…. بعد السلام والكلام… لقيتها بتطلع من شنطتها رواية… بصيتلها وانا مفنجلة عنيا من المفاجأة.. قولتلها أيه ده… جبتيها منين دي؟

_ أنا اللي عاوزة افهم منك والله يانجوى… وبعدين اقولك وصلتني ازاي.

حكيتلها الموضوع كله من أوله لأخره بكل حذافيره… وسألتها تاني… قوليلي بقا الرواية وصلتك ازاي.

_ أبدا ياستي… صاحب سيف كان بياخد درس خصوصي عند زياد.. وزياد سأله عن رقم سيف، وكلمه واتقابلوا في مكتبة جنب المدرسة واداله الرواية قاله دي أمانة توصلها للأستاذة نجوى قريبتك…

_ يادي الفضايح… يادي الإحراج… إزاي يعمل كدة… شكله زودها عالآخر ولازم يقف عند حده..

_ خلاص يانجوى إهدي واللي حصل حصل خلاص… أكيد هو معندوش سوء نية في اللي حصل بس احنا اللي لازم ناخد بالنا عشان كل خطوة محسوبة علينا..

_ عندك حق طبعا… وخصوصا واحدة في ظروفي… المفروض كل كلمة محسوبة عليا… منا مطلقة… (وفضلت أبكي واقول… منك لله يااحمد.. إنت وسهيلة… خلتوني أحمل لقب.. الناس بتعتبره وصمة عار على جبين كل ست… ولازم تكون هي الوحشة اللي قصرت ومعرفتش تحافظ على بيتها وجوزها… وتتحول لفريسة ومطمع لكل من هب ودب)

_ خلاص بقا يانوجا ياحبيبتي إهدي ومتعمليش كدة في نفسك… اللي حصل حصل خلاص.. عاوزاكي تفضلي قوية وصلبة.. وطول مانتي ماشية صح وواثقة من نفسك… ميهمكيش كلام حد..

خلصنا قعدتنا وروضة سابتني وروحت…. بعدها لقيت رسالة من زياد بيتطمن الأمانة وصلت… مارديتش عليه… قاللي اول ماتقريها يهمني أعرف رأيك… فتحت الشات وعملتله حظر…. كان ممكن أرد عليه واطلب منه مايتكلمش تاني عالخاص… لكن حبيت اقفل أي باب ممكن يجيبلي وجع الدماغ.