وكان لقاءنا٢
اندفعت “ريناد” إلى الداخل وخلفها “ثريا” ….
هتفت “خديجة” وهي لا تصدق وجود “ريناد” أمامها؛ فقد سافرت مع زوجها لخارج البلاد.
– “ريناد”.
اتجهت “ريناد” نحوهم تشكو لهم ما حدث لها بغربتها.
– ضحك عليا… ضــ,,ـــــربني لحد ما اجهضت وبعدين رماني… كان منعني أكلمكم…حياتي معاه ضــ,,ـــــرب وشتيمة.
سقطت دموعها وهي تُخبرهم بمعانتها بصوت خرج متقطعًا ثُمّ حاولت التقاط أنفاسها.
اتجهت “ثريا” إلى “خالد” تهتف به برجاء.
– أنت لازم تعمل حاجه يا “خالد”، لازم تدفعه التمن.
اقتربت “خديجة” من “ريناد” التي انهارت بالبكاء وقد تمزق قلب “خديجة” وهي ترى شقيقتها بتلك الحالة المزرية.
– أنا نصحتها وهي مسمعتش كلامي.. طلبت مني متدخلش في حياتها.
نظرت إليه “ثريا” وهي تعلم أنه على حق.
– عندك حق بس هنعمل إيه اللي حصل حصل.
تركت “ريناد” ذراع “خديجة” التي وقفت جوارها ثُمّ صرخت بها بحقد.
– أنتِ السبب ،أنتِ السبب في كل اللي أنا فيه.
انصدمت “ثريا” من هجوم “ريناد” عليها لتتساءَل.
– أنا السبب يا “ريناد”.
– ايوة أنتِ السبب… أنتِ اللي دمرتيني… كنتِ عايزانى أحقق أحلامك اللي محققتيهاش.
ابتلعت “ريناد” غصتها بمرارة وهي تنظر إلى “ثريا” التي احتلت الصدمة ملامحها.
– لازم تكوني دايمًا حلوة، لازم تخطفي كل الأنظار حواليكِ، لازم تستغلي جمالك… بنت فلانه اتجوزت عريس لقطه..لازم تبصي لفوق يا “ريناد” اوعي تبصي لتحت زي ما انا بصيت.
شعرت السيدة “لطيفة” بالشفقة نحو الفتاة التي لم تتقبلها يومًا بسبب طريقتها المتحررة.
اقتربت “ثريا” منها وهي تشير نحو حالها.
– يعني أنا في الأخر السبب… ده أنا دايمًا كنت مميزاكِ…عمري ما بصيت لأختك ولا اهتميت بيها… أنتِ أنانيه.
نطقتها “ثريا” بقلب ممزق لتصرخ “ريناد” عاليًا بعدما نعتتها بذلك الوصف الذي يليق بها أيضًا.
– أنا أنانية وأنتِ إيه يا “ثريا” هانم…
وقفت “خديجة” بينهم تنظر لزوجها الذي اتخذ دور المتفرج وحماتها التي طالعتهم بنظرة مشفقة.
وضعت بيدها على بطنها تشعر بالاختناق بعدما وضعوها طرفًا بينهم.
– بسببك كرهت أختي، اللي اكتشفتي فجأة إن ليكِ بنت تانيه بعد ما حققت اللي طول عمرك نفسك فيه.
– كفايه.
خرج صوت “خديجة” بصراخ بعدما أعادوا لها ذكريات من القهر، وهي ترى والدتها تعامل “ريناد” بحب، وتميزها لكن هي، وكأنها لم تُنجبها.
